एन्फामाथिको निलम्बन फुकुवा

काठमाडौं। राष्ट्रिय खेलकुद परिषद् (राखेप) ले अखिल नेपाल फुटबल संघ (एन्फा) नेतृत्वमाथि लगाएको निलम्बन फुकुवा गरेको छ। एन्फा महासचिवसहितको पदाधिकारी टोलीले शुक्रबार शिक्षा तथा खेलकुद मन्त्री सस्मित पोखरेल लगायतलाई भेटेर छलफल गरेपछि निलम्बन फुकुवा गर्ने सहमति भएको हो।

एन्फाका प्रवक्ता सुरेश शाहले निलम्बन फुकुवा भएको पुष्टि गरे। बिनासर्त निलम्बन फुकुवा भएको र फिफालाई यसबारे जानकारी गराएपछि विस्तृत कुरा बताउने उनले जानकारी दिए। निलम्बन फुकुवासँगै नेपाली महिला टोली साफ महिला च्याम्पियनसिपमा सहभागी हुने सम्भावना बढेको उनले बताए।

यसअघि राखेपले पटक-पटक दिएको निर्देशन पालना नगरेको भन्दै गत ११ चैतमा खेलकुद विकास ऐन २०७७ को दफा २९ को (२) लाई टेकेर एन्फा नेतृत्वमाथि निलम्बन गर्ने निर्णय गरेको थियो।