बागमतीलाई राष्ट्रपति रनिङ शिल्डको उपाधि

काठमाडौें । साविक विजेता बागमती प्रदेशले १६ औँ केन्द्रीय राष्ट्रपति रनिङ शिल्ड खेलकुद प्रतियोगिताको उपाधि जितेको छ । विभिन्न ६ खेल समावेश प्रतियोगितामा २२ स्वर्ण, २१ रजत र १३ कांस्य जित्दै बागमतीले उपाधि जितेको हो ।
राष्ट्रिय खेलकुद परिषद् (राखेप) को आयोजनामा भएको प्रतियोगितामा सुदूरपश्चिम प्रदेश १९ स्वर्ण, ९ रजत र १४ कांस्य पदका साथ दोस्रो भयो । १२ स्वर्ण, १५ रजत र १८ कांस्य पदक जित्दै लुम्बिनी प्रदेश तेस्रो भयो । ५ स्वर्ण, २ रजत र १८ कांस्यसाथ गण्डकी प्रदेश चौथो, ४ स्वर्ण, ७ रजत र १७ कांस्यका साथ कोशी प्रदेश पाँचौँ, ३ स्वर्ण, ६ रजत र ६ कांस्यसाथ मधेस प्रदेश छैटौँ तथा २ स्वर्ण, ५ रजत र १२ कांस्यसाथ कर्णाली प्रदेश सातौँ स्थानमा रहे ।
तीन दिने प्रतियोगितामा सात प्रदेशबाट ६ सय ८६ खेलाडीले एथलेटिक्स, भलिबल, कबड्डी, तेक्वान्दो, कराँते र उसुमा प्रतिस्पर्धा गरेका थिए ।

खेलाडीलाई राखेपका सदस्यसचिव रामचरित्र मेहतालगायतले पुरस्कार प्रदान गरे । पदक विजेतालाई करिब १२ लाख नगद पुरस्कार वितरण गरिएको प्रतियोगिता व्यवस्थापन तथा सञ्चालन समितिका सचिव मीनकुमार शर्माले जानकारी दिए ।

प्रतियोगिताको १७ औँ संस्करण कोशी प्रदेशमा फागुन १९ देखि २२ गतेसम्म हुने भएको छ ।