जीपी कोइराला ५–ए साइड महिला हक्कीको उपाधि त्रिभुवन आर्मीलाई

विराटनगर । विभागीय टोली त्रिभुवन आर्मी क्लबले विराटनगरमा सम्पन्न ‘जीपी कोइराला ५–ए साइड महिला हक्की च्याम्पियनसिप’को उपाधि जितेको छ । विराटनगरस्थित सायस फुटसल एरिनामा भएको रोमाञ्चक फाइनल भिडन्तमा गण्डकी प्रदेशलाई ५–३ गोल अन्तरले पराजित गर्दै आर्मीले च्याम्पियनको ट्रफी उचालेको हो ।

उपाधिसँगै आर्मीले ५० हजार रुपैयाँ नगद पुरस्कार प्राप्त गरेको छ भने उपविजेता बनेको गण्डकी प्रदेशले ३० हजार रुपैयाँमा चित्त बुझाएको छ । कोशी प्रदेशमा पहिलो पटक आयोजना गरिएको ५–ए साइड महिला हक्की प्रतियोगिताको उपाधि रक्षा गर्ने क्रममा आर्मीका लागि नीलिमा पाण्डेले ह्याट्रिकसहित ३ गोल गरिन् भने सुनिता नेगीले २ गोलको योगदान दिइन् । गण्डकीका तर्फबाट मयुरी राईले २ र सोनु बरालले १ गोल फर्काए पनि टोलीलाई जित दिलाउन पर्याप्त भएन ।

Advertisement

प्रतियोगितामा उत्कृष्ट प्रदर्शन गरेकी आर्मीकी सविना केसी प्लेयर अफ द टुर्नामेन्ट घोषित भइन् । त्यस्तै, मधेस प्रदेशकी लक्ष्मनिया दासले उदीयमान खेलाडीको विधामा पुरस्कार हात पारिन् ।

विजेता तथा उपविजेता टोली र खेलाडीहरूलाई कोशी प्रदेश खेलकुद विकास बोर्डका उपाध्यक्ष वसन्तराज अर्याल, जीपी कोइराला स्पोर्ट्स एकेडेमीका रञ्जन थापा, नेपाल हक्की संघ कोशी प्रदेश अध्यक्ष जीवनराज तिम्सिना लगायतले पुरस्कार तथा प्रमाणपत्र वितरण गरे ।

प्रतियोगितामा आर्मीले आफ्ना सबै ४ खेलमा जित निकाल्दै अपराजित यात्रा तय गरेको थियो । उपविजेता गण्डकीले ४ मध्ये २ खेलमा जित, १ मा हार र १ खेलमा बराबरी खेलेको थियो । यता आयोजक तथा घरेलु टोली कोशी प्रदेश ४ अंकसहित चौथो स्थानमा सीमित भयो ।

च्याम्पियनसिपमा विभागीय टोली त्रिभुवन आर्मीसहित कोशी, गण्डकी, मधेस र बागमती प्रदेशका टोलीहरूको सहभागिता रहेको थियो ।