राखेपका नवनियुक्त पदाधिकारीलाई ओलम्पियन र खेलाडी संघद्वारा स्वागत

काठमाडौं । नेपाल ओलम्पियन एसोसिएसन र नेपाल राष्ट्रिय तथा अन्तर्राष्ट्रिय खेलाडी संघले राष्ट्रिय खेलकुद परिषद् (राखेप) का नवनियुक्त उपाध्यक्ष र बोर्ड सदस्यहरूलाई एक विशेष कार्यक्रमका बीच स्वागत तथा सम्मान गरेका छन् ।

त्रिपुरेश्वरस्थित खेलाडी संघको कार्यालयमा संयुक्त रूपमा आयोजित उक्त कार्यक्रममा राखेपका नवनियुक्त उपाध्यक्ष विशाल श्रेष्ठ तथा बोर्ड सदस्यहरू सिक्का सुवाल श्रेष्ठ, शक्तिप्रसाद गौचन र पवन शाहीलाई स्वागत गरिएको हो ।

Advertisement

ओलम्पियन एसोसिएसनका अध्यक्ष एवं कीर्तिमानी ओलम्पियन दीपक विष्ट र खेलाडी संघका अध्यक्ष दीपक श्रेष्ठलगायतका पदाधिकारीले नवनियुक्त पदाधिकारीहरूलाई कार्यकालको पूर्ण सफलताको शुभकामना दिँदै मायाको चिनो प्रदान गरेका थिए ।

सो अवसरमा बोल्दै दुवै संघका अध्यक्षहरूले नयाँ नेतृत्वको आगमनसँगै नेपाली खेलकुद क्षेत्रले नयाँ गति लिने र खेलाडीहरूको हकहितमा ठोस काम हुने विश्वास व्यक्त गरे ।

नवनियुक्त बोर्ड सदस्य मोनालिसा खम्बु भने कार्य व्यस्तताका कारण कार्यक्रममा उपस्थित हुन सकिनन् । उनी रोहिंग्या शरणार्थी समुदायलाई चेस (बुद्धिचाल) प्रशिक्षण दिनका लागि बिहीबार नै बंगलादेश प्रस्थान गरेको जानकारी दिइएको छ । कार्यक्रममा विभिन्न खेलका खेलाडी तथा पदाधिकारीहरूको उपस्थिति रहेको थियो ।