रास्वपा महाधिवेशनको बन्दसत्र सुरु हुन सकेन

चितवन । चितवनमा जारी सत्तारुढ राष्ट्रिय स्वतन्त्र पार्टी (रास्वपा)को महाधिवेशनअन्तर्गत प्रतिनिधिहरूको नामावलीलाई अन्तिम रूप दिन ढिलाइ हुँदा बन्दसत्र निर्धारित समयमा सुरु हुन सकेको छैन ।

सोमबार बिहान साढे ८ बजेदेखि बन्दसत्र सञ्चालन गर्ने कार्यतालिका तय गरिएको भए पनि प्रतिनिधिहरूको विवरण सच्याउने काम नसकिएकाले कार्यक्रम पछाडि धकेलिएको हो । रास्वपा निर्वाचन समितिका प्रमुख भुवन केसीका अनुसार प्रतिनिधिहरूको नामावलीमा देखिएका त्रुटि सच्याउने काम जारी छ ।

Advertisement

प्रतिनिधिहरूको नाम, थर र ठेगाना नमिलेका कारण परिचयपत्र तयार गर्न समस्या भएको उनले बताए । केही प्रदेशसहित मधेश प्रदेशबाट छनोट भएका प्रतिनिधिको विषयमा समेत विवाद देखिएपछि अन्तिम सूची टुंग्याउन थप समय लागेको हो ।

निर्वाचन समितिले आइतबार करिब चार हजार महाधिवेशन प्रतिनिधिको प्रारम्भिक नामावली सार्वजनिक गरेको थियो । त्यसपछि प्राप्त गुनासा र विवरण सच्याउने प्रक्रिया चलिरहेकाले बन्दसत्र सुरु हुने समय अनिश्चित बनेको नेताहरूले बताएका छन् । उनीहरूका अनुसार बन्दसत्र सुरु हुन अलि समय लाग्ने देखिन्छ ।

बन्दसत्रस्थल वरपर प्रतिनिधिहरूको उल्लेख्य भिड देखिएको छ । महाधिवेशनको बन्दसत्रमा केन्द्रीय समितिबाट पारित विधान संशोधन प्रस्ताव, सांगठनिक तथा राजनीतिक प्रतिवेदन तथा आर्थिक प्रतिवेदन प्रस्तुत गर्ने कार्यसूची तय गरिएको छ । प्रतिनिधिहरूको अन्तिम टुंगो लागेपछि मात्रै औपचारिक बन्दसत्र सुरु गरिने निर्वाचन समितिले जनाएको छ ।