मोरङलाई प्रदेशमै प्रथम बनाउने एभरेस्टका पौडी खेलाडी सम्मानित

विराटनगर । कोशी प्रदेशस्तरीय पौडी प्रतियोगितामा मोरङ जिल्लालाई प्रथम बनाउन महत्त्वपूर्ण भूमिका खेल्ने एभरेस्ट स्कुलका खेलाडीहरूलाई सम्मान गरिएको छ। विद्यालयमा एक कार्यक्रम आयोजना गरी जिल्लाको प्रतिनिधित्व गर्दै १६ वटा पदक जित्न सफल ६ जना खेलाडीहरूलाई सम्मान गरिएको हो।

विद्यालयका प्रिन्सिपल टीकाराम पुरीले विद्यार्थीहरूलाई सम्मान गरे । उनले प्रदेशमा जिल्लालाई प्रथम बनाउन तपाईंहरूले खेलेको भूमिकाले एभरेस्टको गरिमा समेत बढेको बताए । कोशी प्रदेश पौडी संघको आयोजनामा असार १६ र १७ गते सुनसरीको इटहरीमा सम्पन्न प्रतियोगितामा मोरङ प्रथम भएको थियो । जसमा एभरेस्ट स्कुलबाट जिल्ला स्तरीय टिममा सहभागी ६ खेलाडीले मात्र ३ स्वर्णसहित १६ पदक जितेका थिए ।

एभरेस्टका तर्फबाट आरध्य पाण्डेले २ वटा स्वर्ण पदक जितेका थिए । पाण्डेले ५० मिटर ब्रेस्टस्ट्रोक र ५० मिटर फ्रिस्टाइलमा स्वर्ण दिलाए । यस्तै, धावा तामाङले १ स्वर्ण (५० मिटर बटरफ्लाई),  ४ वटा रजत, १ कास्य पदक जिते । तामाङले फ्रिस्टाएल विधाका ५० बटरफ्लाई स्वर्ण,  ५०, १००, ४०० र ८०० सय मिटर फ्रिस्टाइलमा रजत र २०० मिटर फ्रिस्टाइलमा रजत पदक प्राप्त गरे ।

कृतक बास्तोलाले २ वटा रजत पदक जिते । उनले ५० र १०० मिटर ब्याकस्ट्रोकमा पदक ल्याए । एभरेस्टका ओनस प्रधानले ५० र १०० मिटर ब्याकस्ट्रोक र २ कास्य पदक जिते । अर्का खेलाडी हर्षित सिंहले २०० मिटर ब्रेस्टस्ट्रोकमा रजत पदक प्राप्त गरे भने युवन श्रेष्ठले २५ र ५० मिटर फ्रिस्टाइलमा कास्य पदक जितेका छन् ।

मोरङलाई प्रथम बनाउन जिग्सन तामाङले ५०, १००, २००, ४०० र ८०० मिटरमा कास्य पदक दिलाए भने डीपीएस स्कुलका भियान केडियाले ८ वर्ष मुनिको स्पर्धामा २५ र ५० मिटर फ्रिस्टाइलमा २ स्वर्ण पदक प्राप्त गरेका थिए ।

यस्तै, बिकेभीएमका बिसु पराजुलीले २५, ५० मिटरमा फ्रिस्टाइलमा रजत, १०० मिटर फ्रिस्टाइलमा कास्य पदक प्राप्त गरे । प्रतियोगितामा मोरङ प्रथम, भोजपुर दोस्रो र झापा तेस्रो भएको थियो ।