इरान युद्धको खर्च ३७.५ अर्ब डलर पुग्यो, थप बजेट माग्दै पेन्टागन

एजेन्सी । इरानसँग जारी सैन्य कारबाहीका कारण अमेरिकाको युद्ध खर्च हालसम्म ३७.५ अर्ब अमेरिकी डलर पुगेको अमेरिकी रक्षामन्त्री पिट हेगसेथले बताएका छन् । उनले अमेरिकी सिनेटको विनियोजन समितिमा बोल्दै गत मे महिनाको अनुमानभन्दा युद्ध खर्च करिब ८ अर्ब डलरले बढेको जानकारी दिएका हुन् ।

हेगसेथका अनुसार युद्ध सञ्चालन, सैनिकको तलब, हतियार तथा गोलाबारुदको आपूर्ति निरन्तर राख्न पेन्टागनलाई तत्काल थप बजेट आवश्यक छ । उनले अमेरिकी रक्षा मन्त्रालयका लागि ८७ अर्ब डलर अतिरिक्त बजेट माग गरेका छन् । जसमध्ये ६७ अर्ब डलर मध्यपूर्वमा जारी सैन्य अभियानका लागि खर्च गरिने प्रस्ताव गरिएको छ ।

Advertisement

उनले आवश्यक बजेट स्वीकृत नभए अमेरिकी सेनाका तालिम कार्यक्रम कटौती गर्नुपर्ने अवस्था आउन सक्ने चेतावनी पनि दिए । विश्व सुरक्षा अवस्था जटिल बन्दै गएकाले अमेरिकाले आफ्नो सैन्य तयारी कमजोर बनाउन नहुने उनको भनाइ थियो ।

यसैबीच, ह्वाइट हाउसले आगामी आर्थिक वर्षका लागि पेन्टागनको कुल बजेट १.५ ट्रिलियन डलर पुर्‍याउने प्रस्ताव कंग्रेससमक्ष पेस गरेको छ । यो प्रस्ताव पारित भए आधुनिक अमेरिकी इतिहासकै सबैभन्दा ठूलो रक्षा बजेट हुनेछ ।

यद्यपि, डेमोक्र्याट सांसदहरूले भने थप बजेटको आवश्यकता र प्रक्रियामाथि प्रश्न उठाएका छन् । उनीहरूले सामान्य बजेट प्रक्रियालाई बेवास्ता गर्दै ठूलो रकम मागिएको आरोप लगाएका छन् ।

केही सांसदले राष्ट्रपति डोनाल्ड ट्रम्पले युद्धमा सफलता दाबी गरिरहेकै बेला थप अर्बौं डलर किन आवश्यक परेको हो भन्ने प्रश्न पनि उठाएका छन् । कंग्रेसको तल्लो सदन बिहीबारदेखि बिदामा जाने र सेप्टेम्बरसम्म संयुक्त बैठक नबस्ने भएकाले पेन्टागनले मागेको बजेट तत्काल स्वीकृत हुने सम्भावना कम देखिएको छ ।

अमेरिकी रक्षा मन्त्रालयका अनुसार इराक र जोर्डनमा भएका पछिल्ला सैन्य कारबाहीका क्रममा थप तीन अमेरिकी सैनिकको मृत्यु भएको छ । गत फेब्रुअरी २८ देखि सुरु भएको इरानसँगको युद्धमा हालसम्म १८ अमेरिकी सैनिकको ज्यान गएको छ ।