सहारा नेपालको निर्वाचनमा होमिएकी प्रमिला तिम्सिना, उत्कृष्ट बुहारीदेखि महिला सदस्यको उम्मेदवारसम्म

झापा । सहारा नेपाल बचत तथा ऋण सहकारी संस्था लिमिटेडको आठौँ अधिवेशनअन्तर्गत नयाँ सञ्चालक समिति चयनका लागि असोज १० गते निर्वाचन हुँदैछ । निर्वाचनमा महिला सदस्य पदका लागि प्रमिला तिम्सिना पनि उम्मेदवार बनेकी छन् ।

झापाको बिर्तामोड नगरपालिका–२ चारपानेमा मुख्य कार्यालय रहेको सहारा नेपाल साकोसको नयाँ नेतृत्व चयनका लागि अध्यक्षसहित विभिन्न पदमा उम्मेदवारी परेको छ । संस्थाका निर्देशक दिनेशबहादुर निरौलाका अनुसार अध्यक्ष पदमा छविलाल खतिवडा, उपेन्द्रप्रसाद ओली र भरतकुमार गिरी प्रतिस्पर्धामा छन् । निर्वाचनबाट नौ सदस्यीय सञ्चालक समिति र तीन सदस्यीय लेखा सुपरिवेक्षण समिति गरी १२ जना निर्वाचित हुनेछन् । अध्यक्षसहित ४५ जना उम्मेदवार चुनावी प्रतिस्पर्धामा रहेको निरौलाले बताए ।

Advertisement

महिला सदस्यतर्फ उम्मेदवारी दिएकी तिम्सिना लामो समयदेखि सहारा नेपालसँग जोडिएको बताइएको छ । संस्थाको स्थापनाकालदेखि नै आफ्नो परिवार सहारा नेपालसँग आबद्ध रहेको र संस्थाको विकास तथा विस्तारमा परिवारले लामो समयदेखि योगदान गर्दै आएको तिम्सिनाको भनाइ छ ।

तिम्सिनाले समाजशास्त्रमा स्नातकोत्तर अध्ययन पूरा गरेकी छन् । उनी र उनका श्रीमान् रुपक दाहाल क्याम्पस तथा कलेजमा प्राध्यापन पेसामा आबद्ध छन् । शिक्षा क्षेत्रमा काम गरेको अनुभवले सदस्यका आवश्यकता, सामाजिक पक्ष र समुदायसँगको सम्बन्ध बुझ्न सहयोग पुगेको तिम्सिनाले बताएकी छन् ।

बिर्तामोड नगरपालिकाभित्र उत्कृष्ट बुहारीका रूपमा सम्मानित भइसकेकी तिम्सिनाको पारिवारिक पृष्ठभूमि पनि सहारा नेपालसँग जोडिएको छ । सहारा नेपालको विकास र संस्थागत विस्तारसँग आफ्नो परिवारको लामो सम्बन्ध रहेको उल्लेख गर्दै उनले अब संस्थाको सञ्चालक समितिमा रहेर आफ्नो अनुभव र जिम्मेवारीलाई उपयोग गर्ने बताएकी छन् ।

पछिल्ला वर्षमा विभिन्न सहकारी संस्थामा बचत रकम दुरुपयोग, हिनामिना र सदस्यको बचत जोखिममा परेको विषय सार्वजनिक भइरहेका छन् । यस्तो अवस्थामा बचत तथा ऋण सहकारी संस्थाको नेतृत्व चयनमा सदस्यको विश्वास, पारदर्शिता, सदस्यहित र संस्थागत सुशासन प्रमुख चासोका विषय बनेका छन् ।

सहारा नेपाल पनि ठूलो संख्यामा सदस्य आबद्ध रहेको बचत तथा ऋण सहकारी संस्था भएकाले असोज १० गते हुने निर्वाचनलाई संस्थाको आगामी नेतृत्व चयनका दृष्टिले महत्वपूर्ण रूपमा हेरिएको छ । निर्वाचनमा महिला सदस्य पदका लागि उम्मेदवारी दिएकी तिम्सिनाले आफ्नो शैक्षिक पृष्ठभूमि, प्राध्यापन अनुभव र सहारा नेपालसँगको लामो सम्बन्धलाई उम्मेदवारीको आधारका रूपमा प्रस्तुत गरेकी छन् ।

संस्थाको आगामी यात्रामा सदस्यको भूमिका महत्वपूर्ण हुने उल्लेख गर्दै तिम्सिनाले आफू निर्वाचित भए संस्थालाई थप व्यवस्थित र प्रभावकारी बनाउन आफ्नो तर्फबाट भूमिका निर्वाह गर्ने बताएकी छन् ।