सुनसरी गोलीकाण्डमा प्रधानमन्त्रीको आश्वासन : पीडितलाई न्याय, दोषीलाई कारबाही

काठमाडौं । प्रधानमन्त्री बालेन्द्र शाह (बालेन)ले सुनसरीको देवानगन्जमा भएको गोलीकाण्डप्रति दुःख व्यक्त गर्दै घटनाका दोषीलाई कानुनबमोजिम कारबाही गरिने र पीडित परिवारलाई न्याय तथा क्षतिपूर्ति उपलब्ध गराइने बताएका छन् ।

सामाजिक सञ्जालमार्फत प्रधानमन्त्री शाहले घटनामा ज्यान गुमाएकाप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गरेका छन् । सुरक्षाकर्मीको गोली लागेर नागरिकको मृत्यु हुनु र अन्य घाइते हुनु अत्यन्त गम्भीर विषय भएकाले घटनाको अनुसन्धान सुरु भइसकेको उनले उल्लेख गरेका छन् ।

Advertisement

सरकारले घटनाको निष्पक्ष छानबिन गरी दोषीलाई कानुनी दायरामा ल्याउने र पीडितलाई न्याय दिलाउने प्रतिबद्धता जनाउँदै यस्ता घटना दोहोरिन नदिन आवश्यक सुधारका कदम पनि चालिने प्रधानमन्त्रीको भनाइ छ । प्रधानमन्त्री शाहले नागरिकलाई संयम अपनाउन, उत्तेजना र बदलाको भावनाबाट टाढा रहन तथा सामाजिक सद्भाव, आपसी विश्वास र सहिष्णुता कायम राख्न आग्रह गरेका छन् ।

उनले सरकारको पहिलो दायित्व नागरिकको सुरक्षा सुनिश्चित गर्नु, पीडितलाई न्याय दिलाउनु र दोषीमाथि कानुनी कारबाही गर्नु रहेको दोहोर्याउँदै उक्त दायित्व पूरा गर्न सरकार प्रतिबद्ध रहेको बताए ।