बाघ संरक्षण वातावरणीय सन्तुलन र भविष्यको सुरक्षाका लागि अनिवार्य: उपराष्ट्रपति यादव

काठमाडौं । उपराष्ट्रपति रामसहाय प्रसाद यादवले बाघको अस्तित्व जोगाउनु केवल एउटा प्रजातिको रक्षा मात्र नभई समग्र वातावरणीय सन्तुलन र मानव जातिको भविष्यको सुरक्षा भएको बताएका छन् ।

अन्तर्राष्ट्रिय बाघ दिवसको अवसरमा शुभकामना सन्देश जारी गर्दै उपराष्ट्रपति यादवले बाघलाई सौन्दर्यको प्रतीक र पारिस्थितिक प्रणालीको आधार स्तम्भका रूपमा चित्रण गरे । उनले बाघ संरक्षणका लागि जनचेतना अभिवृद्धि र नीतिगत सुधारमा जोड दिए ।

Advertisement

उपराष्ट्रपति यादवले बाघको अस्तित्व संकटमा पर्नुको मुख्य कारणबारे चर्चा गर्दै अवैध सिकार, छाला तथा दाँतको अवैध व्यापार, वन विनाश, डढेलो र अव्यवस्थित सहरीकरणलाई प्रमुख चुनौतीका रूपमा औँल्याए । उनले यी समस्या समाधान गर्न नीति निर्माणकर्ताहरूलाई दीर्घकालीन योजना र कार्यक्रम तर्जुमा गर्न आग्रह समेत गरे ।
नेपालले पछिल्लो दशकमा बाघ संरक्षणको क्षेत्रमा विश्वमै उदाहरणीय र उल्लेखनीय सफलता हासिल गरेको स्मरण गर्दै उनले भने, ‘संरक्षित क्षेत्रको सन्तुलित व्यवस्थापन, चोरी–सिकारीमा नियन्त्रण र स्थानीय समुदायको सक्रिय सहभागिताले बाघको संख्यामा उत्साहजनक वृद्धि भएको छ ।’

यद्यपि, बाघको संख्या बढेसँगै देखिएका मानव–वन्यजन्तु द्वन्द्व, वासस्थानको खण्डीकरण र जलवायु परिवर्तन जस्ता नयाँ चुनौतीहरूलाई समयमै सम्बोधन गर्नु पर्नेमा उनले जोड दिए ।

बाघ संरक्षणले जैविक विविधताको मात्र रक्षा नगरी मुलुकको पर्यटकीय सम्भावनालाई समेत बलियो बनाउने उपराष्ट्रपतिको भनाइ छ । बाघ पाइने क्षेत्रहरूमा पर्या–पर्यटन प्रवर्धन गर्दा स्थानीय समुदायको आर्थिक स्तर उकास्न प्रत्यक्ष सहयोग पुग्ने उनले उल्लेख गरे ।

सन्देशको अन्त्यमा उपराष्ट्रपति यादवले बाघ संरक्षणको साझा जिम्मेवारी पूरा गर्न सबै सरोकारवाला निकाय, संरक्षणकर्मी र आम नागरिकलाई एकजुट हुन आह्वान गरे । उनले अन्तर्राष्ट्रिय बाघ दिवसले सबैलाई प्रकृतिप्रति जिम्मेवार बन्न प्रेरणा मिलोस् भन्ने कामना समेत व्यक्त गरे ।