एनपिएलको तेस्रो संस्करण कात्तिक ९ देखि

काठमाडौं । नेपाल क्रिकेट संघ (क्यान) ले नेपाल प्रिमियर लिग (एनपिएल) को तेस्रो संस्करणको मिति घोषणा गरेको छ । क्यानका सचिव पारस खड्काले विज्ञप्ति जारी गर्दै आगामी प्रतियोगिता कात्तिक ९ गतेदेखि मंसिर ५ गते (अक्टोबर २६ देखि नोभेम्बर २१) सम्म सञ्चालन हुने जानकारी दिएका हुन् ।

यसअघिको तुलनामा यो सिजन केही समय अगाडि नै सुरु हुन लागेको हो । क्रिकेट प्रेमीहरूमाझ निकै लोकप्रिय रहेको यस प्रतियोगिताको पहिलो संस्करण जनकपुर बोल्ट्स र दोस्रो संस्करण लुम्बिनी लायन्सले जितेका थिए ।

दुवै संस्करणको फाइनलमा सुदूरपश्चिम रोयल्स भने उपविजेतामा सीमित भएको थियो । क्यानले यतिबेला तेस्रो संस्करणलाई थप भव्य बनाउने तयारी सुरु गरिसकेको छ ।