पुष्पलाल स्मृति राष्ट्रिय ब्याडमिन्टन आजदेखि: १५ विधामा ४०० खेलाडी भिड्दै

काठमाडौं । ब्याडमिन्टन खेलको प्रतिष्ठित प्रतियोगिता ‘पुष्पलाल स्मृति राष्ट्रिय वरियता ब्याडमिन्टन’ को चौधौँ संस्करण सोमबार (आज) देखि ललितपुरको ग्वार्कोस्थित यल स्पोर्टस् एकेडेमीमा सुरु हुँदैछ ।

नेपाल खेलकुद महासंघअन्तर्गतको राष्ट्रिय ब्याडमिन्टन संघ र यल स्पोर्टस् एकेडेमीको संयुक्त आयोजनामा हुने यो प्रतियोगिता साउन ३० गतेसम्म चल्ने छ। खेलाडीको उत्साहजनक सहभागिताका कारण यस पटक प्रतियोगिताको अवधि एक दिन थप गरी ७ दिन पुर्‍याइएको छ।

प्रतियोगितामा १५ वटा विभिन्न विधामा प्रतिस्पर्धा हुनेछ । जसमा शीर्ष ८ वरियताका महिला / पुरुष एकल, शीर्ष ८ बाहेकका एकल, खुला युगल, यु–११, यु–१५, र यु–१९ (छात्र / छात्रा) का साथै ३५, ४५ र ५५ वर्षमाथिको मास्टर्स खुला युगल समावेश छन् । मास्टर्स विधामा विदेशी खेलाडीहरूलाई समेत आमन्त्रण गरिएको छ ।

कुल ४१ लाख ५ हजार लागत अनुमान गरिएको यस प्रतियोगिताको पुरस्कार राशि १० लाख ७८ हजार रुपैयाँ रहेको छ । शीर्ष ८ वरियताको विधामा विजेताले ५० हजार, उपविजेताले ३५ हजार र तेस्रो हुनेले १५ हजार रुपैयाँ प्राप्त गर्नेछन् । साथै, लिग चरणमा खेल्ने खेलाडीले सहभागिता बापत १५ सय र प्रत्येक जित बापत थप १५ सय रुपैयाँ पाउने छन् ।

प्रतियोगितामा लगातार तीन संस्करण जित्ने खेलाडीलाई विशेष पुरस्कार स्वरूप मोटरसाइकल वा स्कुटर प्रदान गरिनेछ । यसअघि प्रिन्स दाहालले लगातार तीन पटक जितेर मोटरसाइकल प्राप्त गरिसकेका छन् ।
प्रतियोगिताको आकर्षण बढाउन विश्व ब्याडमिन्टन परिषद् सदस्य एवं पाकिस्तान ब्याडमिन्टन संघका अध्यक्ष वाजिद अली चौधरीको समेत उपस्थिति रहने महासचिव सुनिलमान शाक्यले जानकारी दिएका छन् ।

प्रतियोगितामा तीन विभागीय टोली (आर्मी, प्रहरी, एपीएफ) सहित ६० जिल्लाका करिब ४०० खेलाडीले आफ्नो कौशल प्रदर्शन गर्नेछन् ।