वीरगन्जमा ५२ लाख ५० हजार नगदसहित चार पक्राउ

वीरगन्ज । पर्साको वीरगन्ज महानगरपालिका–१० आदर्श नगरबाट स्रोत नखुलेको ५२ लाख ५० हजार रुपैयाँसहित चार जना पक्राउ परेका छन् ।  सोमबार साँझ ६ः३० बजे आदर्श नगर क्षेत्रमा दुई वटा मोटरसाइकललाई रोकेर चेकजाँच गर्ने क्रममा प्रहरीले उक्त ठुलो परिमाणको नगद बरामद गरेको हो ।

भारत बिहारका २६ वर्षीय सुरज कर्ण, बारा प्रसौनीका ३२ वर्षीय उपेन्द्र साह र २६ वर्षीय सागरकुमार सर्राफ तथा पर्सा विन्दवासिनीका २५ वर्षीय राहुलकुमार गुप्तालाई स्रोत नखुलेको रकमसहित पक्राउ गरेको प्रहरीले जनाएको छ ।

प्रहरीका अनुसार प्रदेश २–०३–००३ प ७२१५ र ना ५७ प ५१८२ नम्बरको मोटरसाइकलमा सवार चारै जनाको साथबाट सो रकम फेला परेको हो ।

प्रहरीका अनुसार सुरज कर्णको साथबाट १ लाख, उपेन्द्र साहको साथबाट १८ लाख १६ हजार, सागरकुमार सर्राफको साथबाट १८ लाख ३४ हजार र राहुलकुमार गुप्ताको साथबाट १६ लाख रुपैयाँ बरामद भएको छ।

बरामद रकममा १ हजार दरका ४ हजार ५ थान (४० लाख ५ हजार), ५ सय दरका २ हजार ३ सय ५३ थान (११ लाख ७६ हजार ५००), १ सय दरका ६ सय ४३ थान र ५० दरका ८४ थान नोटहरू रहेका छन् ।

स्रोत नखुलेको सो रकम र मोटरसाइकलसहित चारै जनालाई नियन्त्रणमा लिएर जिल्ला प्रहरी कार्यालय पर्साले थप अनुसन्धान अघि बढाएको जनाएको छ।