इरानको धम्कीपछि ट्रम्पले यसरी बदलेका थिए विमान

एजेन्सी। अमेरिकी राष्ट्रपति डोनाल्ड ट्रम्प गत महिना इरानबाट आएको हत्याको धम्कीपछि टर्कीबाट गोप्य रूपमा एउटा सानो विमानमार्फत बेलायततर्फ प्रस्थान गरेको खुलासा भएको छ।

उनी ठूलो आकारको ‘एयर फोर्स वन’ विमानमा चढेको देखिए पनि पछि सो विमानबाट अलग्गिएर सानो सी-३२ए विमानमार्फत टर्कीबाट बाहिरिएको वासिङ्टन पोस्टले उल्लेख गरेको छ। वासिङ्टन पोस्टसँग कुरा गर्दै एक अमेरिकी अधिकारीले राष्ट्रपति ट्रम्प गत जुलाई ८ मा अंकारामा एयर फोर्स वन विमानमा चढेको जानकारी दिएका छन्।

Advertisement

विमानमा जोडिएको खानपान सामग्री राख्ने कन्टेनरमार्फत उनलाई गोप्य रूपमा सानो सी-३२ए विमानसम्म पुर्‍याइएको र सोही विमानले उनलाई सुरक्षित रूपमा बेलायत पुर्‍याएको बताइएको छ। यस प्रक्रियाका क्रममा सञ्चारमाध्यमका प्रतिनिधि तथा केही उच्च अधिकारीहरूलाई समेत राष्ट्रपति ट्रम्प अझै ठूलै एयर फोर्स वनमा रहेको भ्रममा राखिएको थियो। ठूलो विमानमा सवार पत्रकारहरूलाई यात्राका क्रममा आफ्ना झ्यालका पर्दाहरू बन्द राख्न निर्देशन दिइएको थियो।

इरानी प्रोक्सी समूहहरूबाट हुन सक्ने सम्भावित खतराका कारण राष्ट्रपति ट्रम्पले टर्कीबाट बाहिरिँदा कतारले अमेरिकालाई उपहारस्वरूप दिएको नयाँ बोइङ ७४७-८ विमान प्रयोग नगरेको सञ्चारमाध्यमहरूले जनाएका छन्। कतारको शाही परिवारले गत वर्ष राष्ट्रपति ट्रम्पको अनुरोधपछि अमेरिकालाई उक्त विलासी विमान उपहारस्वरूप दिएको थियो।

उक्त नयाँ विमानमा पुरानो एयर फोर्स वनमा जस्तै आवश्यक सम्पूर्ण सुरक्षा सुविधाहरू, विशेष गरी क्षेप्यास्त्र प्रतिरोधी प्रणाली (मिसाइल डिफेन्स सिस्टम) पूर्ण रूपमा जडान भइनसकेको बताइएको छ।

वासिङ्टन पोस्टको यस रिपोर्टका सम्बन्धमा ह्वाइट हाउसले नयाँ एयर फोर्स वनको सुरक्षा व्यवस्थाको बचाउ गरेको छ। ह्वाइट हाउसका सञ्चार निर्देशक स्टीभन चेउङले नयाँ विमान अत्याधुनिक रहेको दाबी गर्दै राष्ट्रपति र उनका कर्मचारीहरूको पूर्ण सुरक्षा सुनिश्चित गर्न उच्चस्तरीय सुरक्षा प्रोटोकलहरू लागू गरिएको स्पष्ट पारेका छन्।