विराटनगरबाट लागुऔषधसहित एक युवक पक्राउ

विराटनगर । विराटनगर महानगरपालिका–१६ दरैया चोकबाट प्रहरीले लागुऔषध ब्राउन सुगरसहित एक युवकलाई पक्राउ गरेको छ ।

भारतको जोगबनीबाट नेपाल आउँदै गरेका सुनसरीको धरान उपमहानगरपालिका–१४ का ३५ वर्षीय शंकर तामाङलाई ब्राउन सुगरसहित पक्राउ गरेको मोरङ प्रहरीले जनाएको छ । प्रहरीका अनुसार बुधबार साँझ ७ बजेतिर इलाका प्रहरी कार्यालय रानी र लागुऔषध नियन्त्रण ब्युरो विराटनगरको संयुक्त टोलीले तामाङलाई नियन्त्रणमा लिएको हो ।

भारतबाट नेपालतर्फ पैदल आउँदै गरेका तामाङलाई शंका लागेर जाँच गर्दा उनको साथबाट ३ ग्राम ७०० मिलिग्राम ब्राउन सुगर फेला परेको प्रहरीले जनाएको छ ।

पक्राउ परेका तामाङलाई थप अनुसन्धानका लागि इलाका प्रहरी कार्यालय रानीमा राखिएको छ । उनीमाथि लागुऔषध नियन्त्रण ऐन अन्तर्गत थप अनुसन्धान तथा कानुनी प्रक्रिया अगाडि बढाइएको प्रहरीले जनाएको छ ।