श्रीमतीलाई पेट्रोल छर्केर आगो लगाउने श्रीमान् प्रहरी नियन्त्रणमा

काठमाडौं ।  सुर्खेतको भेरीगंगा नगरपालिका–१३ रामघाटमा श्रीमानले आफ्नै श्रीमतीलाई पेट्रोल छर्केर आगो लगाएका छन् । मंगलबार साँझ भएको घटनामा ५० वर्षीया महेश्वरी राना गम्भीर घाइते भएकी प्रहरीले जनाएको छ ।

प्रहरीका अनुसार ४९ वर्षीय श्रीमान् जयबहादुर रानाले साँझ करिब ५ बजेतिर महेश्वरीको शरीरमा पेट्रोल छर्केर आगो लगाएका थिए । घटनालगत्तै उनकी छोरी पुष्पा रानाले आगो निभाएर आमालाई तत्काल उपचारका लागि सुर्खेत पुर्‍याएकी थिइन् । आगोले महेश्वरीको अनुहार, घाँटी र शरीरका विभिन्न भाग गरी करिब ३५–३६ प्रतिशत भाग जलेको बताइएको छ ।

सुर्खेतमा प्रारम्भिक उपचारपछि उनलाई थप उपचारका लागि नेपालगन्जस्थित भेरी अस्पताल लगिएको थियो । त्यहाँ पनि उपचार प्रभावकारी हुन नसकेपछि गए राति नै उनलाई थप उपचारका लागि भारतको लखनउ ‘रिफर’ गरिएको प्रहरीले जनाएको छ ।

घटनामा संलग्न जयबहादुर रानालाई प्रहरीले नियन्त्रणमा लिएको छ । यद्यपि, उनी पनि घाइते भएकाले हाल प्रदेश अस्पताल कालागाउँमा प्रहरी निगरानीमा उपचाररत छन् । घरायसी विवादका कारण हुनसक्ने प्रारम्भिक अनुमान प्रहरीले गरिएको छ । घटनाबारे थप अनुसन्धान भइरहेको प्रहरीले जनाएको छ ।