पत्रकार किशोर श्रेष्ठको बन्दी प्रत्यक्षीकरण रिटमाथि सर्वोच्चमा सुनुवाइ हुँदै 

काठमाडौं । पत्रकार किशोर श्रेष्ठलाई थुनामुक्त गर्न माग गर्दै सर्वोच्च अदालतमा दायर गरिएको बन्दी प्रत्यक्षीकरण रिटमाथि सुनुवाइ हुँदैछ । श्रेष्ठकी पत्नी सरस्वती श्रेष्ठले दायर गरेको उक्त रिट न्यायाधीश बालकृष्ण ढकालको इजलासमा पेशी चढेको हो ।

रिटमा पत्रकार श्रेष्ठलाई बिना आधार र कारण पक्राउ गरी गैरकानुनी रूपमा थुनामा राखिएको दाबी गर्दै तत्काल थुनामुक्त गर्न माग गरिएको छ ।

Advertisement

दीपिका सिंहको जाहेरीका आधारमा व्यक्तिगत गोपनीयतासम्बन्धी कसुरमा संलग्न रहेको आरोपमा श्रेष्ठलाई बुधबार राति प्रहरीले पक्राउ गरेको थियो । पक्राउ परेका श्रेष्ठलाई बिहीबार अदालतमा उपस्थित गराइएपछि अनुसन्धानका लागि थप तीन दिन हिरासतमा राख्न म्याद थप गरिएको थियो ।

प्रहरीले हिरासतमा लिएर अनुसन्धान अघि बढाएपछि श्रेष्ठकी पत्नीले सो कार्य गैरकानुनी भएको दाबी गर्दै सर्वोच्चको गएकी हुन् । आज हुने सुनुवाइबाट श्रेष्ठको थुनासम्बन्धी विषयमा सर्वोच्च अदालतले प्रारम्भिक आदेश जारी गर्ने अपेक्षा गरिएको छ ।