नेपाल पुलिस क्लब र एग्रो थाई फुड्सबीच प्रायोजन सम्झौता

काठमाडौं । नेपाल प्रहरी शारीरिक सुगठन तथा खेलकुद शिक्षालय र एग्रो थाई फुड्सबीच खेल व्यवस्थापन, प्रशिक्षण र व्यावसायिक खेलको विकासका लागि सम्झौता भएको छ । शुक्रबार आयोजित एक विशेष कार्यक्रमका बीच नेपाल प्रहरी शारीरिक सुगठन तथा खेलकुद शिक्षालय र एग्रो थाई फुड्सबीच औपचारिक समझदारी पत्रमा हस्ताक्षर भएको हो ।

नेपाल पुलिस क्लबका विभिन्न खेलकुद टोलीहरूको व्यवस्थापन, प्रशिक्षण र व्यावसायिक विकासका लागि नेपाल प्रहरी र एग्रो थाई फुड्सबीच तीन वर्षे प्रायोजन सम्झौता भएको छ । नेपाल प्रहरी खेलकुद समितिका सदस्यसचिव एवं राष्ट्रिय प्रहरी प्रशिक्षण प्रतिष्ठानका कार्यकारी निर्देशक अतिरिक्त प्रहरी महानिरीक्षक (एआईजी) राजन अधिकारी र एग्रो थाई फुड्सको व्यापार विभाग प्रमुख सोनिया राणाले समझदारी पत्रमा हस्ताक्षर गरे ।

Advertisement

सम्झौता अनुसार एग्रो थाई फुड्सले आगामी तीन वर्षसम्मका लागि नेपाल पुलिस क्लबका विभिन्न ५ वटा टोलीहरूलाई प्रायोजन गर्ने छ । यसमा भलिबलतर्फ महिला र पुरुष, फुटबलतर्फ महिला र पुरुष तथा पुरुष क्रिकेट टोली समावेश छन् ।

यस सहकार्यले पुलिस क्लबका खेलाडीहरूको तयारी, विशेष प्रशिक्षण, ब्रान्डिङ र राष्ट्रिय तथा अन्तर्राष्ट्रिय स्तरका प्रतियोगिताहरूमा सहभागितालाई अझ मजबुत बनाउने लक्ष्य राखेको छ । सम्झौता हस्ताक्षर कार्यक्रममा बोल्दै दुवै पक्षले सम्झौताका सर्तहरू पूर्ण रूपमा पालना गर्दै खेल क्षेत्रको विकासमा योगदान दिने प्रतिबद्धता व्यक्त गरेका छन् ।

एआईजी अधिकारीले यस प्रकारको निजी क्षेत्रसँगको सहकार्यले विभागीय टोलीको व्यावसायिकता र खेलाडीहरूको मनोबल उच्च बनाउन महत्त्वपूर्ण भूमिका खेल्ने बताए । त्यस्तै, एग्रो थाई फुड्सकी सोनिया राणाले नेपाली खेलकुदको क्षेत्रमा नेपाल पुलिस क्लब जस्तो प्रतिष्ठित संस्थासँग जोडिन पाउनु गौरवको विषय भएको उल्लेख गरिन् ।

यो तीन वर्षे प्रायोजनले नेपाल पुलिस क्लबको खेल कौशललाई नयाँ उचाइमा पुर्‍याउन र खेलाडीहरूको समग्र विकासमा कोसेढुंगा साबित हुने अपेक्षा गरिएको छ ।