चीनतर्फ फसेका ११४ नेपाली तातोपानी नाका हुँदै नेपाल फर्किए

सिन्धुपाल्चोक । रसुवाको भोटेकोशी बाढीका कारण चीनतर्फ फसेका ११४ नेपाली नागरिक आज (बिहीबार) तातोपानी नाका हुँदै नेपाल फर्किएका छन् । तातोपानी अध्यागमन कार्यालयका प्रमुख पदमराज तिमल्सिनाका अनुसार केरुङमा सुरक्षित रहेका नेपालीलाई चिनियाँ पक्षले राहदानी नम्बरलगायत विवरणसहित तातोपानी नाकाको लिपिङ क्षेत्रमा ल्याएर नेपाली अधिकारीको जिम्मा लगाएको हो ।

प्रमुख जिल्ला अधिकारी शशीधर घिमिरेका अनुसार रसुवागढी नाका र पासाङल्हामु राजमार्ग बाढीका कारण क्षतिग्रस्त भएपछि अस्थायी पास लिएर केरुङ पुगेका नेपाली त्यहाँ अलपत्र परेका थिए। चीनले उनीहरूलाई तातोपानी नाकासम्म ल्याउन सहजीकरण गरेको हो । नेपाल फर्किनेमा अधिकांश सिन्धुपाल्चोक, नुवाकोट र रसुवाका नागरिक छन् । ल्हासास्थित नेपाली महावाणिज्य दूतावासका अनुसार अस्थायी पास लिएर केरुङ पुगेकाहरूलाई नेपाल फर्काइएको हो ।

Advertisement

रसुवागढी नाकाबाट केरुङसम्म सामान लिन, लोड–अनलोड गर्न तथा होटल–रेस्टुराँमा काम गर्न जाने नेपालीले भिसा लिनुनपर्ने व्यवस्था छ । अस्थायी अनुमति लिएर जाने नेपाली तिब्बततर्फ ३० किलोमिटरभित्रसम्म जान पाउँछन् ।

महावाणिज्यदूत लक्ष्मीप्रसाद निरौलाका अनुसार केरुङमा करिब १ हजार ६०० नेपाली रहेको अनुमान छ । तीमध्ये नेपाल फर्किन ८०० जनाले नाम टिपाएका छन्। अधिकांश सामान लिन, किनमेल तथा लोड–अनलोडको कामका लागि केरुङ पुगेका नेपाली रहेको उनले बताए ।