कृष्ण मन्दिरमा राष्ट्रपति पौडेलको पूजाआराधना

काठमाडौं । राष्ट्रपति रामचन्द्र पौडेलले कृष्ण जन्माष्टमीका अवसरमा ललितपुरको पाटनस्थित कृष्ण मन्दिरमा पूजाआराधना गरी भगवान् श्रीकृष्णको दर्शन गरेका छन् । राष्ट्रपति पौडेल प्रथम महिला सविता पौडेलसहित पाटन दरबार क्षेत्रमा रहेको कृष्ण मन्दिर पुगेका हुन्। उनले मन्दिरमा पूजाआराधना गरी पुजारीबाट फूल तथा प्रसाद ग्रहण गरे। त्यसपछि पुजारीलाई दक्षिणासमेत प्रदान गरे ।

मन्दिर परिसरमा राष्ट्रपति पौडेललाई ललितपुर महानगरपालिकाका प्रमुख चिरीबाबु महर्जन, जिल्ला समन्वय समितिका प्रमुख ऋषिदेव फुयाँल, प्रमुख जिल्ला अधिकारी नरहरि घिमिरेलगायतले स्वागत गरेका थिए । सो अवसरमा सांसद, प्रदेश सभासद् तथा पूर्वमन्त्रीहरू पनि उपस्थित थिए ।

Advertisement

दर्शन तथा प्रसाद ग्रहणपछि राष्ट्रपति पौडेलले मङ्गहिटीको समेत अवलोकन गरे । भगवान् श्रीकृष्णको जन्म भएको सम्झनामा हरेक वर्ष भाद्र कृष्ण अष्टमीका दिन कृष्ण जन्माष्टमी मनाइन्छ । यस अवसरमा पाटनको कृष्ण मन्दिरसहित देशभरका कृष्ण मन्दिरमा दिनभर पूजाआराधना र दर्शनका लागि भक्तजनको भीड लागेको छ ।

धार्मिक विश्वासअनुसार द्वापर युगमा भाद्र कृष्ण अष्टमीकै दिन भगवान् श्रीकृष्णको जन्म भएको मानिन्छ । कृष्ण जन्माष्टमीले धार्मिक आस्थासँगै नेपालको मौलिक कला, संस्कृति, परम्परा र सामाजिक सद्भावलाई समेत प्रतिबिम्बित गर्दै आएको छ ।

राजा सिद्धिनरसिंह मल्लको पालामा १७ औँ शताब्दीमा निर्माण भएको पाटनको कृष्ण मन्दिरमा मल्लकालदेखि नै कृष्ण जन्माष्टमीका दिन राष्ट्राध्यक्षबाट विशेष पूजाआराधना हुँदै आएको परम्परा छ । राजतन्त्रको अन्त्यपछि विसं २०६५ देखि राष्ट्रपतिले राष्ट्रप्रमुखका रूपमा उक्त परम्परालाई निरन्तरता दिँदै आएका छन् ।