माथिल्लो त्रिशूली-१ आयोजनास्थलमा ६ वटा शव फेला

काठमाडौं । बाढीले क्षतिग्रस्त २१६ मेगावाटको माथिल्लो त्रिशूली–१ जलविद्युत् आयोजनास्थलमा खोजी तथा उद्धारका क्रममा ६ जनाको शव फेला परेको छ ।

स्वतन्त्र ऊर्जा उत्पादकहरूको संस्था नेपाल (इप्पान) का अनुसार उद्धार टोलीले आयोजनाको सल्लेटार क्षेत्रबाट ती शव संकलन गरेको हो । नेपाली सेनामार्फत बट्टार ल्याइएका शव अत्यधिक बिग्रिएको अवस्थामा रहेकाले हालसम्म पहिचान खुल्न सकेको छैन ।

Advertisement

बाढीका कारण आयोजनाको सुरुङभित्र करिब ३०० जना कामदार तथा कर्मचारी फसेको आशंका गरिएको छ । सम्पर्कविहीन रहेकाको खोजीका लागि शुक्रबार दिनभर हेडवर्क्स र सुरुङ क्षेत्रमा उद्धार टोली परिचालन गरिएको थियो ।

खोजी तथा उद्धारमा कोरियाली प्राविधिक टोली, शेर्पा र सर्च एन्ड रेस्क्यु टोलीसहित १५ वटा भारी उपकरण, विशेष क्यामेरा तथा तालिमप्राप्त कुकुर परिचालन गरिएको छ । सुरुङभित्र भरिएको पानी निकाल्न उच्च क्षमताका वाटर पम्पसमेत निरन्तर सञ्चालनमा राखिएको छ ।

इप्पानका अनुसार बाढी आउनुअघि आयोजनास्थलमा १ हजार ४३३ जना कार्यरत थिए । तीमध्ये हालसम्म ८७६ जनाको सकुशल उद्धार भइसकेको छ । अझै ठूलो संख्यामा मानिस सम्पर्कविहीन रहेकाले शनिबार थप उपकरण र प्रविधिको प्रयोग गरी सुरुङ तथा हेडवर्क्स क्षेत्रमा खोजी तथा उद्धारलाई तीव्रता दिइने भएको छ ।