जेनजी आन्दोलनको अपमान सह्य हुँदैन : गृहमन्त्री

काठमाडौं । गृहमन्त्री सुधन गुरुङले जेनजी आन्दोलनको इतिहासलाई गलत ढंगले व्याख्या नगर्न पुराना राजनीतिक दलका नेताहरूलाई चेतावनी दिएका छन् ।

उनले आन्दोलनमाथि प्रश्न उठाउनु वा त्यसको अपमान गर्नु लाखौँ युवामात्र नभई देशका ३ करोड नेपाली जनताको अपमान हुने बताए । जेनजी सहिद स्मृति दिवसको अवसरमा मंगलबार आयोजित कार्यक्रममा बोल्दै गृहमन्त्री गुरुङले जेनजी आन्दोलन नेपालको इतिहासमा स्थापित भइसकेको दाबी गरे ।

Advertisement

उनले इतिहासलाई आफ्नो अनुकूल व्याख्या गर्ने प्रयास नगर्न पुराना दलका नेताहरूलाई आग्रह गरे । ‘अझै पनि पुराना दलका केही साथीहरूले हाम्रो आन्दोलनलाई विभिन्न तरिकाले व्याख्या गरिरहेको देखिन्छ । त्यो दिन इतिहास हो र इतिहास कसैले फेरेर फेरिँदैन,’ उनले भने, ‘इतिहास फेर्ने कोसिस पनि नगर्नुस् ।’

गुरुङले जेनजी आन्दोलनको पक्षमा नेपाली जनताले दिएको समर्थनबाट यसको वैधानिकता पुष्टि भएको दाबी गरे । आन्दोलनलाई अपमान गर्नेहरूले जनताको भावनाको अपमान गरिरहेको उनको भनाइ थियो ।

‘यो आन्दोलनलाई अपमान गर्नुहुन्छ भने तपाईंले ३ करोड नेपाली जनतालाई अपमान गरिरहनु भएको छ । त्यसैले सुध्रिनुस्, अझै पनि समय छ,’ उनले भने । उनले पुरानो राजनीतिक सोचबाट नयाँ नेपाल निर्माण हुन नसक्ने पनि बताए । जेनजी आन्दोलन सत्ताप्राप्ति वा शक्तिको प्रदर्शनका लागि नभएको उनको दाबी थियो ।

गृहमन्त्री गुरुङले सुशासनको माग गर्दै आन्दोलनमा उत्रिएका युवामाथि तत्कालीन सरकारले गोली चलाएको आरोप पनि लगाए । उनले जेनजी आन्दोलनका मागलाई सरकारले सम्बोधन गर्ने प्रतिबद्धता व्यक्त गरे ।

उनले पार्टी सभापति रवि लामिछाने र प्रधानमन्त्री बालेन्द्र (बालेन) शाहले देशमा सुशासन स्थापना गर्ने उद्देश्यका साथ आफूहरूलाई अगाडि सारेको बताए । आफूहरू सत्ताको लोभ वा शक्तिको घमण्डमा नरहेको दाबी गर्दै गुरुङले सरकारका मन्त्रीहरूले निरन्तर काम गरिरहेको बताए । आफूले जिम्मेवारी निर्वाह गर्दा सानो कमजोरीसमेत नहोस् भनेर सचेत रहने गरेको उनको भनाइ थियो ।

‘मलाई सुत्न पनि डर लाग्छ । कुनै दिन मबाट कुनै कमजोरी पो भइहाल्ने हो कि, सय दिनुपर्नेमा ९९ मात्र पो दिने हो कि भन्नेमा सचेत छु,’ उनले भने, ‘म आफूले सक्ने हरदम प्रयास गरिरहेको छु । म मात्र होइन, हाम्रो सरकारका सबै मन्त्रीले काम गरिरहनु भएको छ ।’