बाढीपहिरोले देशका विभिन्न राजमार्ग प्रभावित, केही सडक पूर्ण रूपमा अवरुद्ध

काठमाडौं । बाढी, पहिरो तथा सडक मर्मतका कारण देशका विभिन्न स्थानमा मुख्य राजमार्ग तथा सडकखण्ड प्रभावित भएका छन् । केही सडक पूर्ण रूपमा अवरुद्ध छन् भने केहीमा एकतर्फी तथा निश्चित समयमा मात्रै सवारी सञ्चालन भइरहेका छन् ।

नेपाल प्रहरीका अनुसार बागमती प्रदेशको रसुवामा बाढीका कारण मुख्य राजमार्ग पूर्ण रूपमा अवरुद्ध भएको छ । २०८३ भदौ १० गतेदेखि अवरुद्ध सडक तत्काल खुल्ने अवस्था नरहेको जनाइएको छ । नुवाकोटको विदुर नगरपालिका–१० सिमटारमा बाढीका कारण पासाङ ल्हामु सडकखण्ड पनि पूर्ण रूपमा अवरुद्ध छ ।

Advertisement

नुवाकोटकै शिवपुरी गाउँपालिका–८ घण्टेखोलामा सम्भावित बाढी तथा पहिरोको जोखिमका कारण टोखा–छहरे सडकखण्डमा राति १० बजेदेखि बिहान ५ बजेसम्म सवारी सञ्चालनमा रोक लगाइएको छ । धादिङमा पृथ्वी राजमार्गअन्तर्गत बेनिघाट रोराङ गाउँपालिका–७ कृष्णभीरमा पहिरोका कारण सडक पूर्ण रूपमा अवरुद्ध छ । सोही राजमार्गको ज्वाङखोला र शीतलबजार क्षेत्रमा भने एकतर्फी सवारी सञ्चालन भइरहेको छ ।

चितवनको नारायणगढ–मुग्लिन सडकखण्डअन्तर्गत तुइनखोलामा सडक मर्मतका कारण सवारी चाप हेरी एकतर्फी सञ्चालन भइरहेको छ । काभ्रेमा पनि बीपी राजमार्गमा निश्चित समय र परिस्थितिअनुसार सवारी सञ्चालन भइरहेको छ ।

गण्डकी प्रदेशको मनाङमा चामे–बेंसीसहर सडकखण्डअन्तर्गत नासो गाउँपालिका–३ धारापानीमा साना सवारी साधन सञ्चालनमा छन् । कर्णाली प्रदेशको हुम्लामा कर्णाली करिडोरअन्तर्गत सर्केगाड गाउँपालिका–६ खरीखेतमा पहिरोका कारण सडक पूर्ण रूपमा अवरुद्ध भएको छ ।

यी हुन् प्रभावित भएका सडकहरु