एन्फाका जोशी र पाण्डेको बन्दी प्रत्यक्षीकरण रिट खारेज

काठमाडौं । अखिल नेपाल फुटबल संघ (एन्फा) का कोषाध्यक्ष रवीन्द्र जोशी र लेखा अधिकृत सञ्जीव पाण्डेलाई थुनामुक्त गर्न माग गर्दै दायर गरिएको बन्दी प्रत्यक्षीकरण रिट सर्वोच्च अदालतले खारेज गरेको छ।

न्यायाधीशद्वय विनोद शर्मा र सुनिलकुमार पोखरेलको संयुक्त इजलासले बिहीबार रिट खारेज गर्ने आदेश दिएको हो । आदेशसँगै उनीहरूलाई पक्राउ गरी अनुसन्धान गरिरहेको प्रहरीको केन्द्रीय अनुसन्धान ब्युरो (सीआईबी)को प्रक्रिया अघि बढ्ने भएको छ।

सीआईबीले करिब १५ दिनअघि पक्राउ गरेका जोशी र पाण्डेले आफूहरूलाई गैरकानुनी रूपमा थुनामा राखिएको दाबी गर्दै सर्वोच्चमा बन्दी प्रत्यक्षीकरण रिट दायर गरेका थिए । प्रारम्भिक सुनुवाइपछि सर्वोच्चले सम्बन्धित मुद्दाको फाइलसमेत झिकाएको थियो ।

उनीहरूमाथि सीआईबीले खेलमा मिलेमतो (म्याच फिक्सिङ), अनियमितता तथा ठगीसम्बन्धी कसुरमा अनुसन्धान गरिरहेको छ । पक्राउपछि आफूहरूको थुना गैरकानुनी भएको दाबी गर्दै उनीहरूले अदालतबाट तत्काल रिहाइको माग गरेका थिए ।

तर सर्वोच्चको बिहीबारको आदेशपछि उनीहरूविरुद्ध भइरहेको अनुसन्धान अघि बढ्ने भएको छ। अदालतको आदेशले रिटमार्फत माग गरिएको तत्काल रिहाइको बाटो भने बन्द भएको छ।