संघीयतालाई सुदृढ बनाउन अझै मेहनत गर्नुपर्छ : मुख्यमन्त्री शाही

विराटनगर । कर्णाली प्रदेशका मुख्यमन्त्री मंगलबहादुर शाहीले संघीयतालाई सुदृढ बनाउन अझै धेरै मेहनत गर्नुपर्ने बताएका छन् । संघीयताबारे विभिन्न भ्रम सिर्जना भइरहेकाले उपलब्धिलाई तथ्यका आधारमा स्थापित गर्न आवश्यक रहेको उनको भनाइ छ ।

विराटनगरमा आयोजित अन्तरप्रदेश मुख्यमन्त्री सम्मेलनलाई सम्बोधन गर्दै शाहीले संघीयता कार्यान्वयन र अभ्यासको झन्डै एक दशक पुग्न लाग्दा विकास, सेवा प्रवाह र शासन व्यवस्थामा महत्त्वपूर्ण उपलब्धि हासिल भएको बताए । तर, नागरिकका कतिपय अपेक्षा पूरा हुन नसक्दा संघीयताबारे भ्रम फैलिने अवस्था रहेको उनले उल्लेख गरे ।

यस्ता भ्रम चिर्दै संघीयतालाई थप सुदृढ बनाउन उच्चस्तरको सहकार्य र निरन्तर मेहनत आवश्यक रहेको शाहीले बताए । संघीयताको मर्मअनुसार प्रदेश सरकार, प्रदेशसभा र प्रदेशहरूबीचको सम्बन्धलाई बलियो बनाउँदै अनुभव आदानप्रदान र सहकार्य बढाउनुपर्नेमा उनले जोड दिए ।

भौगोलिक विकटता र विभिन्न चुनौतीका बाबजुद नागरिकका अपेक्षा पूरा गर्दै संघीयतालाई संस्थागत गर्न कर्णाली प्रदेश प्रतिबद्ध रहेको पनि उनले बताए ।