कोशीमा चाडपर्व सुरक्षाका लागि ८ हजारभन्दा बढी प्रहरी परिचालन

विराटनगर । दसैँ, तिहार, छठलगायत चाडपर्वलाई लक्षित गर्दै कोशी प्रदेशमा ८ हजार १३३ प्रहरी परिचालन गरिने भएको छ । नेपाल प्रहरीले देशभर लागू गरेको चाडपर्व विशेष सुरक्षा योजनाअन्तर्गत कोशी प्रदेशमा उक्त संख्यामा प्रहरी परिचालन गर्न लागिएको हो ।

नेपाल प्रहरीका केन्द्रीय प्रवक्ता तथा डीआईजी अबिनारायण काफ्लेका अनुसार चाडपर्वका समयमा नागरिकको जनधनको सुरक्षा, धार्मिक तथा सांस्कृतिक आस्थाको सम्मान र सम्भावित आपराधिक गतिविधि नियन्त्रण गर्न देशभर ५० हजार ४५८ प्रहरी परिचालन गरिनेछ ।

देशभर परिचालन हुने प्रहरीमध्ये कोशी प्रदेशमा ८ हजार १३३ जना खटिनेछन् । चाडपर्वका बेला हुनसक्ने चोरी, लुटपाट, ठगी, जुवातास, अनलाइन ठगी, बेटिङ तथा अवैध कारोबार नियन्त्रण गर्न प्रदेशमा सुरक्षा व्यवस्था कडा पारिने प्रहरीले जनाएको छ ।

चाडपर्वका समयमा सर्वसाधारणको आवतजावत बढ्ने भएकाले सार्वजनिक यातायात, बसपार्क, बजार क्षेत्र, बैंक तथा वित्तीय संस्था, धार्मिक स्थल र मुख्य सडक तथा चोकलाई सुरक्षा निगरानीको प्राथमिकतामा राखिनेछ । सम्भावित दुर्घटना तथा आपराधिक घटना रोक्न प्रहरी परिचालनसँगै अनुगमन र निगरानीलाई समेत तीव्र बनाइने प्रहरीले जनाएको छ ।

खुला सीमानाकाबाट हुनसक्ने अवैध हातहतियार, पटका, विस्फोटक पदार्थ तथा लागुऔषधको ओसारपसार र तस्करी नियन्त्रणमा पनि विशेष सतर्कता अपनाइनेछ । चाडपर्वका बेला हुनसक्ने विभिन्न सुरक्षा चुनौतीलाई ध्यानमा राखेर आवश्यकताअनुसार प्रहरी परिचालन गरिने जनाइएको छ ।

लामो दूरीका सार्वजनिक सवारीसाधनमा यात्रुको चाप बढ्ने भएकाले यात्रु तथा सडक सुरक्षालाई ध्यानमा राखेर सहायता कक्षसमेत स्थापना गरिनेछ । देशभर विभिन्न स्थानमा ४०८ वटा यात्रु सहायता कक्ष स्थापना गरी १ हजार १६५ प्रहरी परिचालन गर्ने प्रहरीको योजना छ । यस्तै, अन्तर्राष्ट्रिय सीमानाकाका १०८ स्थानमा हेल्प डेस्क स्थापना गरी थप ७०५ प्रहरी परिचालन गरिनेछ ।

यात्रु सहायता कक्षबाट यात्रुलाई आवश्यक सूचना तथा सहयोग उपलब्ध गराउनुका साथै हराएका वा भेटिएका व्यक्ति तथा सामानबारे समन्वय गरिनेछ । महिला, बालबालिका तथा ज्येष्ठ नागरिकलाई विशेष सहायता प्रदान गर्ने र यात्रुका गुनासो तत्काल सम्बन्धित प्रहरी कार्यालयमा पुर्‍याउने व्यवस्था मिलाइने प्रहरीले जनाएको छ ।

सवारीसाधनको सुरक्षित आवागमनका लागि चालकको अनुमतिपत्र, मादक पदार्थ तथा लागुपदार्थ सेवन, सवारीको सिट क्षमताअनुसार यात्रु राखे नराखेको र सवारीको प्राविधिक अवस्थासमेत जाँच गरिनेछ । लामो दूरीका सवारीसाधनमा दुई जना चालक भए नभएको विषयमा पनि निगरानी गरिनेछ । प्रहरीले चाडपर्व सुरक्षा योजनामा सीसीटीभी, बडीवर्न क्यामेरा, ड्रोन तथा तालिमप्राप्त कुकुरको प्रयोगलाई समेत प्राथमिकता दिएको छ । सामाजिक सञ्जालबाट फैलिन सक्ने भ्रामक सूचना र डिजिटल माध्यमबाट हुने आपराधिक गतिविधिमाथि निगरानी बढाइनेछ ।

अनलाइन सपिङका नाममा हुने ठगी, बैंकिङ ठगी तथा ओटीपी, पिन र पासवर्ड मागेर गरिने फिसिङबाट जोगिन प्रहरीले सर्वसाधारणलाई आग्रह गरेको छ । अपरिचित व्यक्तिले माग्दैमा बैंकिङ विवरण तथा गोप्य सूचना उपलब्ध नगराउन पनि प्रहरीले अनुरोध गरेको छ । सुरक्षा व्यवस्थालाई प्रभावकारी बनाउन स्थानीय समुदाय, व्यवसायी, यातायात व्यवसायी, बैंक तथा वित्तीय संस्था र अन्य सरोकारवाला निकायसँग समन्वय गरिने प्रहरीले जनाएको छ ।