एनपीएलमा चार टोलीको परीक्षा, जनकपुर र विराटनगर दबाबमा

काठमाडौं । नेपाल प्रिमियर लिग (एनपीएल)मा आज (बिहीबार) दुई खेल हुँदैछन् । पहिलो जितको खोजीमा रहेका जनकपुर बोल्ट्स र विराटनगर किंग्सलाई जितको लय समात्ने चुनौती छ भने काठमाडौं गोर्खाज र कर्णाली याक्स आफ्नो लक्ष्य पूरा गर्ने योजनासहित मैदानमा उत्रिनेछन् ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा दिउँसो साढे १२ बजे जनकपुर बोल्ट्स र काठमाडौं गोर्खाजबीच प्रतिस्पर्धा हुनेछ । पहिलो खेलमा कर्णाली याक्ससँग १९ रनले पराजित जनकपुरका लागि बिहीबारको खेल प्रतियोगितामा पुनरागमन गर्ने अवसर हो । यता, प्रतियोगितामा पहिलो खेल खेल्न लागेको काठमाडौं जितबाट यात्रा सुरु गर्ने दाउमा छ ।

पहिलो खेलमा बेहोरेको हारपछि जनकपुरलाई अब जित निकाल्नुपर्ने दबाब छ । काठमाडौं भने पहिलो खेलमै जित हासिल गर्दै प्रतियोगितामा बलियो सुरुवात गर्न चाहन्छ । त्यसैले दुवै टोलीका लागि यो खेल अंकतालिकामा खाता खोल्ने महत्वपूर्ण अवसर बन्नेछ ।

बिहीबारको दोस्रो खेलमा कर्णाली याक्स र विराटनगर किंग्स भिड्नेछन् । जनकपुरलाई १९ रनले हराउँदै प्रतियोगितामा विजयी सुरुवात गरेको कर्णाली लगातार दोस्रो जित निकाल्ने लक्ष्यमा छ । पहिलो खेलको सफलता कायम राख्न सके कर्णालीले आफ्नो दाबेदारी थप बलियो बनाउन सक्छ ।

चितवन राइनोजसँग आठ रनले पराजित विराटनगर पहिलो हारको निराशा भुलाउँदै मैदान उत्रिनेछ । झिनो अन्तरले पहिलो खेल गुमाएको विराटनगरका लागि कर्णालीविरुद्धको प्रतिस्पर्धा जितको खाता खोल्ने अवसर हुनेछ ।

बिहीबारका दुवै खेलमा टोलीको रणनीति, दबाब सामना गर्ने क्षमता र निर्णायक क्षणमा प्रदर्शनले नतिजा निर्धारण गर्नेछ । जनकपुर र विराटनगरका लागि पहिलो जितको खोजी रहँदा काठमाडौं र कर्णालीको लक्ष्य भने जितको अवसर सदुपयोग गर्नु हुनेछ ।