
काठमाडौं । निवर्तमान अर्थमन्त्री रामेश्वर खनालले आफूले प्रयोग गर्दै आएको कूटनीतिक राहदानी (रातो पासपोर्ट) सरकारलाई फिर्ता गरेका छन् । मंगलबार सामाजिक सञ्जालमार्फत उनले मन्त्रीको हैसियतमा प्राप्त गरेको राहदानीको प्रयोजन समाप्त भएको भन्दै फिर्ता गरेको जानकारी दिएका हुन् ।
उनले अर्थ मन्त्रालयको प्रशासन महाशाखालाई सम्बोधन गर्दै राहदानी विभागमा बुझाइदिनका लागि आफ्नो कूटनीतिक राहदानी नम्बर डीए०००२७१० संलग्न राखी पठाएका छन् । खनालले पदबाट बाहिरिएसँगै राजकीय सुविधा फिर्ता गरेर नैतिकताको उदाहरण प्रस्तुत गरेको भन्दै सामाजिक सञ्जालमा उनको प्रशंसा भइरहेको छ ।
























