मनमोहनमा एलएलएमका विद्यार्थीलाई पुरस्कार र स्वागत   

विराटनगर । मनमोहन प्राविधिक विश्वविद्यालयले कानुनतर्फ एलएमका पुराना विद्यार्थीहरूलाई पुरस्कृत गर्दै नयाँ विद्यार्थीलाई अभिमुखीकरणसहितको स्वागत गरेको छ ।

विश्वविद्यालयको ‘मनमोहन इन्स्टिच्युट अफ ल’ ले शनिवार अपराध शास्त्रमा एलएलएमका पहिलो समूहका उत्कृष्ट विद्यार्थीहरूलाई नगदसहित पुरस्कृत गर्दै नयाँ विद्यार्थीलाई अभिमुखीकरणसहितको स्वागत गरेको हो ।

विराटनगरमा भएको कार्यक्रममा बोल्दै विश्वविद्यालयको ‘स्कुल अफ एप्लाइड  साइन्स टेक्नोलोजी अफ ल’ का डिन डा. रेखा श्रेष्ठले पाठ्यक्रम अनुसार गुणस्तरीय पढाइ र समयमै परीक्षा र परीक्षाफल प्रकाशनका लागि विश्वविद्यालयले कुनै सम्झौता नगर्ने बताइन् । उनले कानुनमा विशेषज्ञता हासिल गर्ने विद्यार्थीलाई उत्तीर्ण हुनका लागि मात्र नभएर अनुसन्धानमा पनि जोड दिन आग्रह गरिन् ।

मनमोहन इन्स्टिच्युट अफ ल का प्राचार्य कोषराज न्यौपानेले गुणस्तरीय पढाइमा जोड दिएकै कारण पहिलो र दोस्रो चरणमै कानुन पढ्ने विद्यार्थीहरूको आकर्षण उच्च भएको बताए । उनले मनमोहनले कानुनमा दक्ष जनशक्ति उत्पादन गर्न अन्तर्राष्ट्रिय विश्वविद्यालयसँग पनि सहकार्य गरिरहेको जानकारी गराए । प्राचार्य न्यौपानेका अनुसार मनमोहन कानुन विश्वविद्यालयले केही वर्षभित्रै कानुनमा पिएचडी तहको पठनपाठन सञ्चालन गराउने सोच बनाइरहेको छ ।

कलेजका शिक्षक तथा अपराध शास्त्री केशवराज पन्तले मनमोहनमा कानुनमा एलएलएम अध्ययन गर्ने पहिलो समूहका विद्यार्थीहरूको पढाइको गुणस्तर आफूले सोचेभन्दा राम्रो पाएको बताए ।
पहिलो समेष्टरका उत्कृष्ट विद्यार्थीहरू रामसुफल सदा र राजेश तिम्सिनाले मनमोहन विश्वविद्यालयको पढाइसँगै परीक्षा प्रणालीको खुलेर प्रशंसा गरे ।

कार्यक्रममा अपराध कानुनमा एलएलएममा भर्ना भएका ३० जना विद्यार्थीहरूलाई स्वागत गर्दै विश्वविद्यालयको शैक्षिक कार्यक्रम, परीक्षा र व्यवस्थापन प्रणालीबारे अभिमुखीकरण गराइएको थियो ।

साथै एलएलएम पहिलो समूहका प्रथम सेमेस्टरबाट रामसुफल सदा प्रथम, लवराज घिमिरे द्वितीय र राजेश तिम्सिना तृतीय भए । उनीहरूले जनही ४८ हजार र जेहेन्ददार विद्यार्थी संजयकुमार यादवलाई कलेजका प्राचार्यको तर्फबाट नगद ११ हजार गिफ्ट ब्याक स्कलरसिप पुरस्कृत गरिएको थियो ।

मनमोहन प्राविधिक विश्वविद्यालयको ‘स्कुल अफ एप्लाइड साइन्स, टेक्नोलोजी अफ ल’  अन्तर्गतको मनमोहन इन्स्टिच्युट अफ ल ले व्यवस्थापन कानुनमा स्नातक र अपराध कानुनमा स्नातकोत्तर तहको पढाइ सञ्चालन गर्दै आएको छ ।