विश्व रेडक्रस दिवस मनाइँदै

काठमाडौं । विश्वभर विश्व रेडक्रस दिवस आज (शुक्रबार) विभिन्न कार्यक्रमसहित मनाइँदैछ । हरेक वर्ष मे ८ तारिखका दिन मनाइने यो दिवसले मानवताप्रतिको सेवा, करुणा र निःस्वार्थ भावनाको सन्देश फैलाउने गर्दछ ।

विपद्, युद्ध, महामारी तथा अन्य आपत्कालीन अवस्थामा बिना भेदभाव सेवा पुर्‍याउँदै आएको रेडक्रस तथा रेडक्रिसेन्ट आन्दोलनमा संलग्न लाखौँ स्वयंसेवक र कर्मचारीहरूको योगदानको सम्मानस्वरूप यो दिवस मनाइन्छ । रेडक्रमका जन्मदाता हेनरी ड्युनाको जन्मदिनसँग जोडिएको यस दिवसले विश्वव्यापी रूपमा मानवीय सहयोगको महत्वलाई झल्काउँछ ।

Advertisement

नेपालमा पनि विभिन्न कार्यक्रमहरू आयोजना गरी यो दिवस मनाइँदैछ । नेपाल रेडक्रस सोसाइटी तथा स्थानीय शाखाहरूले रक्तदान, स्वास्थ्य सचेतना, विपद् जोखिम न्यूनीकरण सम्बन्धी कार्यक्रम र जनचेतनामूलक गतिविधि सञ्चालन गरिरहेका छन् । युवाहरूलाई स्वयंसेवामा प्रेरित गर्ने उद्देश्यले विद्यालय तथा समुदायस्तरमा पनि कार्यक्रम भइरहेका छन् ।

रेडक्रस आन्दोलनका मूल सिद्धान्तहरू मानवता, निष्पक्षता, तटस्थता, स्वतन्त्रता, स्वैच्छिक सेवा, एकता र सार्वभौमिकता हुन् । यी सिद्धान्तका आधारमा संस्था विश्वभर संकटमा परेका मानिसहरूको सहयोगमा सक्रिय रहँदै आएको छ ।

पछिल्ला वर्षहरूमा प्राकृतिक विपद् र स्वास्थ्य संकट बढ्दै जाँदा रेडक्रसको भूमिका अझ महत्वपूर्ण बनेको छ । यस दिवसले समाजमा सेवा, सहयोग र एकताको भावना बलियो बनाउन प्रेरणा दिने विश्वास गरिएको छ ।