दुई जना पूर्वमन्त्रीलाई मृत्युदण्ड

एजेन्सी । चीनले भ्रष्टाचार मुद्दामा दोषी ठहर भएका दुई पूर्वरक्षामन्त्रीलाई निलम्बित मृत्युदण्डको सजाय सुनाएको छ । चिनियाँ अदालतले पूर्वरक्षामन्त्री ली साङ्फु र वेई फेङ्गेविरुद्ध ठूलो रकम घुस लिएको तथा शक्ति दुरुपयोग गरेको निष्कर्ष निकाल्दै यस्तो फैसला गरेको हो ।

बीबीसीका अनुसार चीनको कानुनी व्यवस्थामा ‘निलम्बित मृत्युदण्ड’ भनेको तत्काल कार्यान्वयन नगरिने मृत्युदण्ड हो । सामान्यतया दोषीले दुई वर्षसम्म थप गम्भीर अपराध नगरे सजायलाई आजीवन काराबासमा परिवर्तन गरिन्छ ।

Advertisement

चीनमा पछिल्ला वर्षहरूमा भ्रष्टाचारविरुद्ध कडा अभियान सञ्चालन हुँदै आएको छ । राष्ट्रपति सी चिनफिङ नेतृत्वको सरकारले उच्च सरकारी अधिकारी, सैन्य नेतृत्व र कम्युनिष्ट पार्टीका प्रभावशाली नेतामाथि समेत निगरानी बढाएको छ ।

पूर्वरक्षामन्त्रीहरूविरुद्धको कारबाहीलाई चीनभित्रको सैन्य अनुशासन कडाइ र शक्ति सन्तुलनसँग जोडेर पनि हेरिएको छ । विश्लेषकहरूका अनुसार चिनियाँ नेतृत्वले सेनाभित्र फैलिएको भ्रष्टाचार नियन्त्रण गर्न कडा सन्देश दिन खोजेको देखिन्छ ।

बीबीसीले जनाएअनुसार चीनले पछिल्लो समय सैन्य संरचनाभित्र आर्थिक अनियमितता, शक्ति दुरुपयोग र गोप्य स्वार्थसम्बन्धी गतिविधिमाथि विशेष निगरानी बढाएको छ । त्यसअन्तर्गत उच्च तहका अधिकारीमाथि छानबिन र कारबाही तीव्र बनाइएको बताइन्छ ।

चीनमा भ्रष्टाचारसम्बन्धी मुद्दामा उच्च पदस्थ अधिकारीलाई कडा सजाय दिने क्रम पछिल्ला वर्षहरूमा लगातार बढिरहेको छ ।