अरनिको कलेजमा विज्ञान पढ्ने विद्यार्थीको तीव्र आकर्षण 

विराटनगर । विज्ञान संकायको पठनपाठनमा कोसी प्रदेशकै अग्रणी शैक्षिक संस्थाको पहिचान बनाएको विराटनगरस्थित अरनिको कलेजमा विद्यार्थीको आकर्षण निकै उत्साहजनक देखिएको छ । कक्षा ११ मा भर्ना हुन चाहने विद्यार्थीहरूको चाप बढेको छ । विद्यार्थी भर्नामा उपलब्ध कोटाभन्दा दोब्बर बढी विद्यार्थीले प्रवेश परीक्षा दिएका छन् ।

कलेजले शनिबार लिएको कक्षा ११ को प्रवेश परीक्षामा २ हजार ४ सय ७७ जना विद्यार्थी सहभागी भएका छन् । कलेज प्रशासनका अनुसार कुल २ हजार ७ सय विद्यार्थीले आवेदन फारम भरेका थिए । यस वर्ष अरनिको कलेजले कक्षा ११ (विज्ञान संकाय) का लागि बिहान र दिउँसो गरी दुई सिफ्टमा जम्मा १ हजार १ सय कोटा निर्धारण गरेको छ । ‘हाम्रो क्षमताभन्दा दोब्बर बढी विद्यार्थी प्रवेश परीक्षामा सामेल भएका छन्, प्रिन्सिपल राजेश कार्कीले भने, ‘सीमित सिटका कारण प्रतिस्पर्धा निकै कडा देखिएको छ ।’

Advertisement

विगत लामो समयदेखि विज्ञान शिक्षामा विशेषज्ञता हासिल गरेको यस कलेजको नतिजा नै यसको मुख्य आकर्षणको केन्द्र हो । यहाँका विद्यार्थीहरूले हरेक वर्ष चिकित्सा (मेडिकल) र इन्जिनियरिङ क्षेत्रका प्रवेश परीक्षाहरूमा देशैभर उत्कृष्ट नतिजा ल्याउँदै आएका छन् ।

प्रिन्सिपल कार्कीले थपे, ‘हाम्रा विद्यार्थीहरूले बर्सेनि ठुलो संख्यामा मेडिकल र इन्जिनियरिङमा पूर्ण छात्रवृत्तिमा नाम निकाल्न सफल भइरहेका छन् । यही गुणस्तरीय नतिजा, अनुभवी शिक्षक र उत्कृष्ट शैक्षिक वातावरणकै कारण अभिभावक र विद्यार्थीको अटुट विश्वास आर्जन गर्न सफल भएका हौँ ।’

विद्यार्थीको बढ्दो चापलाई मध्यनजर गर्दै कलेजले भौतिक पूर्वाधार र जनशक्ति व्यवस्थापनमा समेत विशेष लगानी गरेको जनाएको छ । आधुनिक प्रयोगशाला, प्रविधिमैत्री कक्षाकोठा र दक्ष प्राध्यापकहरूको समूह नै कलेजको बलियो खम्बा रहेको प्रशासनको दाबी छ ।

शनिबार सम्पन्न प्रवेश परीक्षाको नतिजा र भर्ना प्रक्रियाका बारेमा कलेजले छिट्टै जानकारी गराउने जनाएको छ ।