उपाधिसहित छनोट यात्रा टुंग्याउने नेपालको लक्ष्य

काठमाडौं । एसियन गेम्स पुरुष क्रिकेट छनोट प्रतियोगिताको उपाधिका लागि नेपालले आज (सोमबार) हङकङसँग प्रतिस्पर्धा गर्दैछ । सिंगापुरमा जारी प्रतियोगिताको फाइनल खेल नेपाली समय अनुसार अपरान्ह १२ः१५ बजे सुरु हुनेछ ।

लगातार उत्कृष्ट प्रदर्शन गर्दै फाइनल पुगेको नेपाल उपाधि जित्ने लक्ष्यसहित मैदान उत्रँदैछ । सेमिफाइनलमा नेपालले ओमानलाई ८ विकेटले पराजित गर्दै सहज रूपमा फाइनल यात्रा तय गरेको थियो । उक्त खेलमा नेपाली टोलीले बलिङ र ब्याटिङ दुवैमा सन्तुलित प्रदर्शन गरेको थियो ।

Advertisement

यता हङकङले पनि सेमिफाइनलमा मलेसियामाथि ६ विकेटको जित निकाल्दै नेपालसँगको उपाधि भिडन्त पक्का गरेको हो । प्रतियोगिताभर दुवै टोलीले प्रभावशाली खेल देखाएकाले फाइनल प्रतिस्पर्धात्मक एवं रोमाञ्चक हुने अपेक्षा गरिएको छ ।

प्रतियोगिताको तेस्रो स्थानका लागि सोमबार नै ओमान र मलेसियाबीच खेल हुँदैछ । उक्त खेल बिहान ७ः१५ बजे सुरु हुनेछ ।

सेमिफाइनलसम्म पुग्न सफल नेपाल, हङकङ, ओमान र मलेसिया चारै टोली आगामी एसियन गेम्सका लागि छनोट भइसकेका छन् । नेपालले अब उपाधिसहित छनोट यात्रा टुंग्याउने लक्ष्य राखेको छ ।