बोस्नियामाथि स्विट्जरल्यान्ड हाबी

अमेरिका । फिफा विश्वकप २०२६ अन्तर्गत भएको खेलमा बोस्निया एन्ड हर्जगोभिनामाथि स्विट्जरल्यान्ड हाबी भएको छ । बोस्नियामाथि दबाब कायम गर्दै स्विट्जरल्यान्डले प्रभावशाली जित निकालेको हो ।

अमेरिकाको लस एन्जलसस्थित सोफाइ रंगशालामा सम्पन्न खेलमा स्विट्जरल्यान्डले बोस्नियालाई ४–१ गोलअन्तरले पराजित गर्दै महत्वपूर्ण तीन अंक हासिल गरेको छ । खेलको पहिलो चरण दुवै टोलीबीच प्रतिस्पर्धात्मक बने पनि दोस्रो चरणमा स्विट्जरल्यान्ड पूर्ण रूपमा हाबी भएको थियो । विशेषगरी बोस्नियाका तारिक मुहारेमोभिच रातो कार्ड पाएर मैदानबाहिरिएपछि स्विट्जरल्यान्डले खेलमा आफ्नो नियन्त्रण थप बलियो बनाएको हो ।

Advertisement

स्विट्जरल्यान्डको जितमा जोहान मान्जाम्बीले दुई गोल गरे । त्यस्तै रुबेन भार्गास र कप्तान ग्रानिट झाकाले एक–एक गोल थपे । बोस्नियाका लागि एर्मिन माहमिकले सान्त्वना गोल फर्काए ।

खेलको ७४औँ मिनेटमा जोहान मान्जाम्बीले गोल गर्दै स्विट्जरल्यान्डलाई अग्रता दिलाएका थिए । त्यसपछि ८०औँ मिनेटमा बोस्नियाका तारिक मुहारेमोभिचले विपक्षी खेलाडीमाथि फउल गरेपछि सिधै रातो कार्ड पाएर मैदान छाड्न बाध्य भए । १० खेलाडीमा सीमित भएको बोस्निया स्विट्जरल्यान्डको आक्रमण रोक्न असफल रह्यो ।

खेलको ८४औँ मिनेटमा रुबेन भार्गासले गोल गर्दै स्विट्जरल्यान्डको अग्रता २–० मा पुर्‍याए । त्यसको छ मिनेटपछि मान्जाम्बीले व्यक्तिगत दोस्रो गोल गर्दै टोलीलाई ३–० को बलियो अवस्थामा पुर्‍याए ।

इन्जुरी समयको सुरुवातमा एर्मिन माहमिकले गोल गर्दै बोस्नियाको आशा जगाउने प्रयास गरे पनि त्यो पर्याप्त हुन सकेन । बरु खेलको अन्तिम समयमा प्राप्त पेनाल्टीलाई कप्तान ग्रानिट झाकाले गोलमा परिणत गर्दै स्विट्जरल्यान्डको ४–१ को सानदार जित सुनिश्चित गरे ।

यो जितसँगै स्विट्जरल्यान्डले दुई खेलबाट चार अंक जोड्दै समूह ‘बी’ को शीर्ष स्थानमा उक्लिएको छ । यसअघि स्विट्जरल्यान्ड पहिलो खेलमा कतारसँग १–१ को बराबरीमा रोकिएको थियो ।

बोस्नियाले भने लगातार दोस्रो खेलमा जित निकाल्न नसक्दा एक अंकमै सीमित भएको छ। पहिलो खेलमा उसले क्यानडासँग १–१ को बराबरी खेलेको थियो । स्विट्जरल्यान्डविरुद्धको खेलमा रातो कार्डपछि कमजोर बनेको बोस्निया अन्तिम समयमा स्विट्जरल्यान्डको आक्रमण थेग्न नसक्दा फराकिलो हार बेहोर्न बाध्य भयो ।