सलाहको टोलीलाई लुकाकुले रोक्दा अंक बाँडियो

सियाटल । अमेरिकाको सियाटलमा सोमबार भएको समूह ‘जी’ अन्तर्गतको प्रतिस्पर्धात्मक खेलमा बेल्जियम र इजिप्टले १–१ को बराबरी खेल्दै अंक बाँडेका छन् । यस समूहमा इरान र न्युजिल्यान्ड पनि रहेका छन् ।

इजिप्टले खेलको १९औं मिनेटमा अग्रता लिएको थियो । कप्तान मोहम्मद सलाहको उत्कृष्ट पासलाई सदुपयोग गर्दै इमाम अशोरले पेनाल्टी क्षेत्रबाट शक्तिशाली प्रहारमार्फत गोल गरेका थिए । राष्ट्रिय टोलीका लागि अशोरको यो पहिलो गोल हो ।

Advertisement

पहिलो हाफको इन्जुरी समयमा बेल्जियमका जेरेमी डोकुले बराबरी गोल गर्ने अवसर खेर फाले । दोस्रो हाफमा कप्तान केभिन डी ब्रुएनाले पनि टोलीलाई खेलमा फर्काउने राम्रो मौका सदुपयोग गर्न सकेनन् ।

खेलको ६६औं मिनेटमा अनुभवी फरवार्ड रोमेलु लुकाकु मैदान प्रवेश गरेपछि बेल्जियमको आक्रमण धारिलो बनेको थियो । लुकाकुको दबाब रोक्ने क्रममा इजिप्टका मोहम्मद हानीबाट आत्मघाती गोल भएपछि बेल्जियमले खेल १–१ को बराबरीमा ल्यायो ।

लुकाकु मैदान छिरेको केही सेकेन्डमै उक्त गोल भएको थियो । त्यसपछि दुवै टोलीले विजयी गोलका लागि प्रयास गरे पनि थप गोल निस्कन नसक्दा खेल बराबरीमै समाप्त भयो ।