जोर्डनमाथि अष्ट्रियाको जित

अमेरिका । फिफा विश्वकप–२०२६ अन्तर्गत आफ्नो पहिलो खेलमा अष्ट्रियाले जोर्डनलाई ३–१ गोलअन्तरले पराजित गर्दै प्रतियोगितामा सुखद सुरुवात गरेको छ ।

अमेरिकाको क्यालिफोर्निया राज्यस्थित सान फ्रान्सिस्को बे एरिया रंगशालामा बुधबार सम्पन्न खेलमा अष्ट्रियाले दोस्रो हाफमा उत्कृष्ट पुनरागमन गर्दै महत्वपूर्ण तीन अंक हात पारेको हो । खेलको २०औँ मिनेटमा रोमानो स्मिडले गोल गर्दै अष्ट्रियालाई अग्रता दिलाएका थिए ।

पहिलो हाफमा यही गोल निर्णायक बनेको थियो । तर, दोस्रो हाफ सुरु भएको पाँच मिनेटमै जोर्डनले खेलमा फर्किने संकेत दियो । ५०औँ मिनेटमा अली ओल्वानले गोल गर्दै जोर्डनका लागि बराबरी गोल गरेका थिए ।

बराबरीपछि दुवै टोलीले आक्रामक खेल प्रस्तुत गरे पनि खेलको ७६औँ मिनेटमा जोर्डनका याजान अल अरबबाट भएको आत्मघाती गोलले अष्ट्रियालाई पुनः अगाडि बढायो । दबाबमा रहेको जोर्डन त्यसपछि खेलमा फर्किन संघर्षरत रह्यो ।

इन्जुरी समयतिर जोर्डनका एक खेलाडीको हातमा बल लागेपछि अष्ट्रियाले पेनाल्टीको अवसर पायो । अनुभवी फरवार्ड मार्को अर्नाउटोभिचले पेनाल्टीलाई गोलमा परिणत गर्दै टोलीको जित सुनिश्चित गरे ।

यस जितसँगै अष्ट्रियाले समूह ‘जे’ मा तीन अंक जोडेको छ । समान तीन अंक भए पनि गोलअन्तरमा अगाडि रहेको अर्जेन्टिना समूहको शीर्ष स्थानमा रहेको छ भने अष्ट्रिया दोस्रो स्थानमा छ । जोर्डन र अल्जेरिया भने पहिलो खेलपछि अंकविहीन अवस्थामा छन् ।

विश्वकप इतिहासमा अष्ट्रियाको यो आठौँ सहभागिता हो । अष्ट्रियाले सन् १९५४ को विश्वकपमा तेस्रो स्थान हासिल गरेको थियो । त्यसपछि लामो समय विश्वकपबाट टाढिएको टोली सन् १९९८ पछि पहिलोपटक विश्वकपमा फर्किएको हो ।

यता, जोर्डनका लागि भने यो विश्वकप विशेष रह्यो । एसियाली राष्ट्र जोर्डनले इतिहासमै पहिलोपटक विश्वकपको अन्तिम चरणमा स्थान बनाएको हो । पहिलो खेलमा पराजित भए पनि टोलीले विश्व फुटबलको सबैभन्दा ठूलो प्रतियोगितामा आफ्नो उपस्थिति दर्ज गराएको छ ।