इन्धनको मूल्य घट्यो

काठमाडौं । नेपाल आयल निगमले पेट्रोलियम पदार्थ (इन्धन)को मूल्य घटाएको छ । निगमले अन्तर्राष्ट्रिय बजारमा इन्धनको मूल्य घटेर आएपछि नयाँ खरिद मूल्यका आधारमा पेट्रोल, डिजेल तथा खाना पकाउने एलपी ग्यासको बिक्री मूल्य समायोजन गरेको हो ।

निगमका अनुसार बुधबार बिहानका राति १२ः०१ बजेदेखि लागू हुने गरी पेट्रोलमा प्रतिलिटर २० रुपैयाँ, डिजेलमा प्रतिलिटर ३० रुपैयाँ तथा खाना पकाउने एलपी ग्यासमा प्रतिसिलिन्डर १०० रुपैयाँले मूल्य घटाइएको छ । इण्डियन आयल कर्पोरेशन (आईओसी)बाट प्राप्त नयाँ खरिद मूल्यअनुसार पेट्रोलको खरिद मूल्य प्रतिलिटर १५ रुपैयाँ ९ पैसा, डिजेलको २९ रुपैयाँ ४६ पैसा, हवाई इन्धनको २९ रुपैयाँ ४२ पैसा तथा एलपी ग्यासको मूल्यसमेत घटेर आएको निगमले जनाएको छ ।

सोहीअनुसार स्वचालित मूल्य समायोजन प्रणालीका आधारमा उपभोक्ताका लागि बिक्री मूल्य पनि घटाइएको निगमको भनाइ छ । निगमले अन्तर्राष्ट्रिय हवाई इन्धनको मूल्यसमेत समायोजन गरेको छ ।

काठमाडौंका लागि अन्तर्राष्ट्रिय हवाई इन्धनको बिक्री मूल्य प्रतिकिलोलिटर २६५ अमेरिकी डलरले घटाइएको छ । त्यसैगरी, पोखरा र भैरहवाका लागि अन्तर्राष्ट्रिय हवाई इन्धनको बिक्री मूल्य ब्रेक–इभेन बिन्दुमा कायम गरिएको निगमले जनाएको छ ।

अन्तर्राष्ट्रिय बजारमा कच्चा तेल तथा पेट्रोलियम पदार्थको मूल्यमा आएको गिरावटको प्रभाव नेपाली बजारमा पनि परेको भन्दै निगमले नयाँ मूल्य बुधबार मध्यरातिदेखि लागू भएको जनाएको छ । नयाँ मूल्यसँगै पेट्रोल, डिजेल र एलपी ग्यास प्रयोग गर्ने उपभोक्ताले केही राहत महसुस गरेका छन् ।