मेयरसहित १३ जनाविरुद्ध मुद्दा

जनकपुरधाम । महोत्तरीको निगौल गाई गौशालाकी कार्यालय प्रमुख कान्तिकुमारी पाण्डेमाथि कुटपिट तथा दुर्व्यवहार भएको घटनामा गौशाला नगरपालिकाका मेयर, वडाध्यक्ष र नगर प्रहरीसहित १३ जनाविरुद्ध आपराधिक उपद्रव तथा हुलदंगा सम्बन्धी मुद्दा दर्ता गरिने भएको छ ।

जिल्ला प्रहरी कार्यालय महोत्तरीका अनुसार गौशाला नगरपालिकाका मेयर डा. दीपेन्द्र महतो, वडा नम्बर २ का अध्यक्ष श्यामसुन्दर मण्डल, नगर प्रहरी प्रमुख टेकबहादुर लामा तथा अन्य आठ जनालाई पक्राउ गरी अनुसन्धान अघि बढाइएको हो । घटनामा संलग्न रहेको आरोपमा वडा नम्बर ११ का दिनेश्वर महतो र वडा नम्बर ४ का इन्दल राउतलाई पनि सोही मुद्दामा प्रतिवादी बनाइएको छ ।

असार ११ गते गौशालाको स्वीकृतिबिना जग्गामा ढल निकास गर्न खोजिएको भन्दै त्यसलाई रोक्न पुगेकी पाण्डेमाथि हातपात र दुर्व्यवहार भएको भिडियो सार्वजनिक भएपछि प्रहरीले अनुसन्धान थालेको थियो । प्रहरीका अनुसार पक्राउ परेका व्यक्तिविरुद्ध दुई पटक म्याद थप गरी अनुसन्धान जारी छ । पाण्डेले दिएको जाहेरीका आधारमा ११ जना नगरपालिकाका प्रतिनिधि तथा कर्मचारी र दुई स्थानीयवासीविरुद्ध मुद्दा दर्ता गरिएको हो ।

निगौल गाई गौशाला र गौशाला नगरपालिकाबीच पुरानो आर्थिक सहमति कार्यान्वयन नहुँदा लामो समयदेखि विवाद रहँदै आएको छ । २०६९ असार २२ गते भएको सहमतिअनुसार गौशालाको जग्गामा सञ्चालन हुने विभिन्न बजारबाट उठेको ठेक्का रकमको २५ प्रतिशत गौशालालाई उपलब्ध गराउने व्यवस्था थियो ।

तर, स्थानीय तहको पुनर्संरचनापछि पनि उक्त सहमति कार्यान्वयन नभएको गौशाला पक्षको दाबी छ । गौशालाको जग्गामा बजार सञ्चालन गरी राजस्व संकलन हुँदै आए पनि सम्झौताअनुसारको रकम प्राप्त नभएको भन्दै व्यवस्थापन पक्षले असन्तुष्टि जनाउँदै आएको छ।