दुर्घटनामा १४ जनाको मृत्यु

एजेन्सी । पेरुको उत्तरी पहाडी क्षेत्रमा यात्रुवाहक भ्यान दुर्घटना हुँदा १४ जनाको मृत्यु भएको छ । दुर्घटनामा पाँच जना घाइते भएका छन् ।

राजधानी लिमाबाट करिब ८ सय किलोमिटर उत्तरमा पर्ने काजामार्काको सान जुआन नगरपालिकानजिक भ्यान सडकबाट तल खोलामा खसेको हो । स्थानीय अधिकारी रिकार्डो चिलोनका अनुसार दुर्घटनामा चालक र एक बालकसहित १४ जनाको ज्यान गएको पुष्टि भएको छ । घाइते पाँच जनाको स्थानीय अस्पतालमा उपचार भइरहेको छ ।

दुर्घटनामा परेको भ्यानमा सान जुआन जिल्लाबाट सियुडाड डे डिओसतर्फ जाँदै गरेका १९ जना सवार थिए । दुर्घटनालगत्तै प्रहरी, अग्निशमनकर्मी र उद्धार टोली घटनास्थलमा पुगेका थिए ।

अग्निशमन विभागका अधिकारी एडसन रोमनका अनुसार भ्यान खोलाभित्र अड्किएकाले उद्धार कार्य निकै चुनौतीपूर्ण बनेको छ । केही शव निकाल्न कठिनाइ भइरहेको उनले बताएका छन् । दुर्घटनाको कारण खुल्न बाँकी रहेको प्रहरीले जनाएको छ । घटनाको अनुसन्धान सुरु गरिएको छ ।

पेरुमा जीर्ण सडक, ट्राफिक नियमको कमजोर पालना र मानवीय त्रुटिका कारण सडक दुर्घटनाका घटना बारम्बार हुने गरेका छन् । सरकारी तथ्यांकअनुसार गत वर्ष मात्र सडक दुर्घटनामा तीन हजारभन्दा बढी मानिसले ज्यान गुमाएका थिए ।