विराटनगरको रथयात्राका क्रममा हालसम्म ९० जना पक्राउ

विराटनगर । विराटनगरमा जारी ५९औँ राधाकृष्ण रथयात्राका क्रममा प्रहरीले हालसम्म ९० जनालाई पक्राउ गरेको छ । पक्राउ पर्नेमा ८९ जना पुरुष र एक जना महिला रहेका छन् ।

रथयात्रामा सहभागी हजारौँको भिडमा चोरी, पाकेटमारी, उच्छृङ्खल, अवाञ्छित तथा शंकास्पद गतिविधि गर्ने व्यक्तिलाई नियन्त्रणमा लिने गरिएको मोरङ प्रहरी प्रमुख एसपी कवित कटवालले बताए । उनका अनुसार पक्राउ परेकालाई वडा प्रहरी कार्यालय विराटनगर र जिल्ला प्रहरी कार्यालय मोरङमा राखिएको छ ।

Advertisement

रथयात्रा जारी रहेकाले पक्राउ पर्नेको संख्या अझै बढ्न सक्ने प्रहरीको अनुमान छ । भिडभाडको मौका छोपेर हुन सक्ने चोरी, पाकेटमारी, झैझगडा तथा अन्य आपराधिक गतिविधि नियन्त्रण गर्न ठूलो संख्यामा सुरक्षाकर्मी परिचालन गरिएको कटवालले बताए ।

उनका अनुसार रथयात्राको सुरक्षा व्यवस्थालाई प्रहरीले उच्च प्राथमिकतामा राखेको छ । भिडको अवस्था र सम्भावित जोखिमको निगरानीका लागि ड्रोनसमेत प्रयोग गरिएको छ ।

प्रहरीले रथयात्रामा सहभागी भक्तजन तथा सर्वसाधारणलाई भिडभाडमा सावधानी अपनाउन, आफ्ना सामानको सुरक्षा गर्न तथा बालबालिका र वृद्धवृद्धाको विशेष ख्याल गर्न आग्रह गरेको छ । कुनै चोरी, झगडा, शंकास्पद गतिविधि, दुर्घटना, व्यक्ति हराउने वा अन्य समस्या भए तत्काल १०० नम्बरमा सम्पर्क गरेर घटनाको जानकारी गराउन प्रहरीले अनुरोध गरेको छ ।