६ हजारभन्दा बढी वडामा कांग्रेसको अधिवेशन, मोरङ–६ सहित केहीमा बाँकी

काठमाडौं । नेपाली कांग्रेसको १५औँ महाधिवेशनका लागि देशभर भइरहेको वडा अधिवेशनअन्तर्गत ७३ जिल्लाका ६ हजार १३२ वडामा निर्वाचन प्रक्रिया पूरा भएको छ ।

कांग्रेस केन्द्रीय निर्वाचन समितिका अनुसार असोज ३ गते शनिबारदेखि सुरु भएको वडा अधिवेशनको दोस्रो दिनसम्म अधिकांश वडामा वडा कार्यसमिति र क्षेत्रीय प्रतिनिधि चयनको प्रक्रिया सम्पन्न भएको हो । तर रसुवा, नुवाकोट र धादिङका सबै वडा तथा सप्तरीका निर्वाचन क्षेत्र नम्बर २ र ४, सिरहा, मोरङ क्षेत्र नम्बर ६, रौतहट क्षेत्र नम्बर १, सर्लाही क्षेत्र नम्बर २ र नवलपरासी पश्चिमको क्षेत्र नम्बर २ मा भने अधिवेशन सम्पन्न हुन बाँकी रहेको समितिले जनाएको छ ।

Advertisement

बाँकी रहेका क्षेत्रमा असोज ५ गते सोमबारसम्म अधिवेशनको प्रक्रिया जारी रहनेछ । कांग्रेस केन्द्रीय निर्वाचन समितिका सदस्य सचिव राजु कटुवालले जारी गरेको विज्ञप्तिमार्फत निर्धारित कार्यतालिकाअनुसार बाँकी वडाको अधिवेशन सम्पन्न गर्न सम्बन्धित पक्षलाई आग्रह गरिएको छ ।

वडा तहबाट चयन हुने प्रतिनिधि तथा कार्यसमितिको प्रक्रियासँगै कांग्रेसको १५औँ महाधिवेशनको तयारी अघि बढिरहेको छ । कांग्रेसले केन्द्रीय महाधिवेशन असोज १६ देखि १९ गतेसम्म काठमाडौंमा गर्ने कार्यतालिका तय गरेको छ ।