भारी हिमपातले आरोहण प्रभावित

गोरखा । मनास्लु हिमाल क्षेत्रमा लगातार भइरहेको वर्षा र भारी हिमपातका कारण यस वर्षको आरोहण प्रभावित भएको छ । मौसम प्रतिकूल बनेपछि केही आरोही आधार शिविरबाटै फर्किन थालेका छन् ।

चुमनुब्री गाउँपालिका–१ सामागाउँका वडाध्यक्ष कर्मा छेवाङ लामाका अनुसार करिब दुई सातादेखि मनास्लु क्षेत्रमा वर्षा र हिमपात निरन्तर भइरहेको छ । मौसममा सुधार आउने अपेक्षामा केही समय पर्खिए पनि अवस्था अनुकूल नबनेपछि आरोहीहरू फर्किन थालेका हुन् ।

Advertisement

उनका अनुसार मनास्लु आसपास करिब पाँच फिटसम्म हिउँ जमेको छ । सरकारले असोज ८ देखि १२ गतेसम्म समेत सतर्क रहन आग्रह गरेकाले आरोहीहरूले जोखिम लिन नचाहेको उनले बताए ।

स्थानीय व्यवसायी प्रबल लामाका अनुसार मनास्लु क्षेत्रमा पछिल्ला १२ वर्षयता यस्तो असामान्य मौसम देखिएको थिएन । उनका अनुसार आधार शिविरमा करिब तीन फिटसम्म हिउँ जमेको छ भने क्याम्प वान, क्याम्प टु र क्याम्प थ्री क्षेत्रमा सातदेखि आठ फिटसम्म हिउँ परिसकेको छ ।

‘यो वर्ष पानी रोकिएको छैन । हिमपात पनि अत्यधिक छ । यस्तो अवस्था यसअघि देखिएको थिएन,’ उनले भने । मौसमका कारण केही आरोही फर्किए पनि सबैले आरोहण अभियान स्थगित गरेका छैनन् ।

सामागाउँका होटल व्यवसायी मिङ्मार छिरिङ लामाका अनुसार करिब १० प्रतिशत आरोही फर्किसकेको अनुमान छ । उनका अनुसार अघिल्ला वर्षमा पनि मौसमका कारण केही आरोही फर्किने गरे पनि यसपटक संख्या तुलनात्मक रूपमा बढी देखिएको छ ।

मनास्लु आठ हजार १६३ मिटर उचाइको विश्वकै चर्चित हिमालमध्ये एक हो । यस याममा करिब पाँच सय आरोहीले मनास्लु आरोहणका लागि अनुमति लिएका छन् ।

गत वर्ष ६७ देशका ४१ समूहका ३६६ पुरुष र १२७ महिला गरी ४९३ आरोहीले मनास्लु आरोहणको अनुमति लिएका थिए । त्यसबाट नेपाल सरकारलाई २२ करोड ४८ लाख १४ हजार रुपैयाँ राजस्व प्राप्त भएको थियो ।

लगातारको हिमपात र जोखिमपूर्ण मौसमले आरोहण तालिका प्रभावित भएपछि यस वर्षको आरोहण अभियान मौसममा निर्भर बनेको छ । मौसममा सुधार आए पनि फर्किएका आरोहीहरू पुनः मनास्लु क्षेत्रमा फर्किने सम्भावना न्यून रहेको स्थानीयको भनाइ छ ।