प्रमुख नदीमा जलसतह बढ्ने, साना नदीमा आकस्मिक बाढीको जोखिम

काठमाडौं । बाढी पूर्वानुमान महाशाखाले देशका प्रमुख नदीमा जलसतह बढ्ने र विभिन्न जिल्लाका साना नदीमा आकस्मिक बाढी आउन सक्ने चेतावनी दिएको छ।

आज  (शुक्रबार) बिहान जारी विशेष बाढी पूर्वानुमान बुलेटिनअनुसार कोशी, नारायणी, बागमती, कन्काई, कमला तथा यी नदीका सहायक नदीमा जलसतह सतर्कता तह नजिक पुगेको छ।

Advertisement

शुक्रबार बिहानको मापनअनुसार पश्चिम राप्ती, बबई, कर्णाली, महाकाली र तिनका सहायक नदीको बहाव भने सतर्कता तहभन्दा तल छ। आज र भोलि देशका अधिकांश प्रमुख नदीमा पानीको बहाव उल्लेख्य बढ्ने पूर्वानुमान गरिएको छ।

महाशाखाका अनुसार आज सप्तकोशी, तमोर, अरुण, दूधकोशी, तामाकोशी, सुनकोशीलगायत कोशी बेसिनका नदीमा जलसतह उल्लेख्य बढ्नेछ। नारायणी, त्रिशूली, बूढीगण्डकी, मर्स्याङ्दी, सेती, कालीगण्डकी, कर्णाली, महाकाली, बागमती र पूर्वी राप्तीमा पनि बहाव बढ्ने अनुमान छ।

तिनाउ, बाणगंगा, पश्चिम राप्ती र बबईमा भने आज सामान्य बढ्ने र भोलि असोज १० गते उल्लेख्य बढ्ने पूर्वानुमान गरिएको छ।

साना नदीमा आउन सक्ने आकस्मिक बाढीको जोखिम हेर्दा आज गण्डकी, लुम्बिनी, कर्णाली र सुदूरपश्चिम प्रदेशका केही जिल्ला बढी प्रभावित हुने देखिएको छ।

महाशाखाका अनुसार गोरखा, लमजुङ, कास्की, मनाङ, मुस्ताङ, दाङ, बाँके, बर्दिया, सुर्खेत, दैलेख, कैलाली, कञ्चनपुर र आसपासका जिल्लाबाट बहने साना नदीमा बहाव उल्लेख्य बढ्ने तथा आकस्मिक बाढीको उच्च जोखिम छ।

यसबाहेक ताप्लेजुङदेखि बैतडीसम्मका अन्य दर्जनौँ जिल्लाका साना नदीमा आकस्मिक बाढीको मध्यम जोखिम रहेको महाशाखाले जनाएको छ।

शनिबार आकस्मिक बाढीको उच्च जोखिम थप जिल्लामा फैलिने पूर्वानुमान छ। नवलपरासी पूर्व, नवलपरासी पश्चिम, रुपन्देही, कपिलवस्तु, अर्घाखाँची, पाल्पा, गुल्मी, स्याङ्जा, तनहुँ, गोरखा, लमजुङ, कास्की, मनाङ, पर्वत, बागलुङ, प्युठान, रोल्पा, सल्यान, दाङ, बाँके, बर्दिया, सुर्खेत, डोटी, डडेल्धुरा, कैलाली र कञ्चनपुर आसपासका नदीमा बाढीको उच्च जोखिम रहने महाशाखाले जनाएको छ।

यस्तै, असोज ११ गते पनि सातै प्रदेश भएर बहने केही साना नदीमा बहाव आकस्मिक रूपमा बढ्न सक्ने भएकाले तटीय क्षेत्रमा सावधानी अपनाउन महाशाखाले आग्रह गरेको छ।