त्रिविका परीक्षा केन्द्रमा सीसी क्यामरा अनिवार्य

काठमाडौं । त्रिभुवन विश्वविद्यालय (त्रिवि) परीक्षा नियन्त्रण कार्यालयले वार्षिक परीक्षा प्रणाली अन्तर्गतका सबै परीक्षा केन्द्रमा सीसी क्यामरा जडान गर्न अनिवार्य गरेको छ ।

त्रिवि केन्द्रीय परीक्षा सञ्चालक समितिको २०८३ साल भदौ ३ गते बसेको बैठकको निर्णयअनुसार परीक्षा सञ्चालन कक्ष, उत्तरपुस्तिका सिलबन्दी गर्ने कक्ष र प्रवेशद्वारको सम्पूर्ण दृश्य स्पष्ट देखिने गरी सीसी क्यामरा जडान गर्नुपर्ने व्यवस्था गरिएको हो ।

कार्यालयका अनुसार क्यामरामा कम्तीमा डेढ महिनासम्मको दृश्य रेकर्ड सुरक्षित हुनुपर्नेछ। साथै, उक्त रेकर्डको अनुगमन गर्न परीक्षा नियन्त्रण कार्यालयलाई पहुँच उपलब्ध गराउनुपर्नेछ ।

आगामी दिनमा परीक्षा सञ्चालन गर्दा यो व्यवस्था अनिवार्य रूपमा पालना गर्न सबै परीक्षा केन्द्रलाई कार्यालयले सूचित गरेको छ । तोकिएबमोजिम सीसी क्यामरा जडान नगर्ने वा अनुगमनको पहुँच उपलब्ध नगराउने परीक्षा केन्द्र परिवर्तनसमेत गर्न सकिने कार्यालयले चेतावनी दिएको छ ।