विराटनगरको फेन्सी पसलमा आगलागी, २० लाखको क्षति

विराटनगर । विराटनगर महानगरपालिका–९ काली मन्दिरस्थित एउटा फेन्सी कपडा पसलमा आगलागी हुँदा करिब २० लाख रुपैयाँ बराबरको क्षति भएको छ ।

काली मन्दिरस्थित कन्हैयालाल साहको घरमा भाडामा सञ्चालन हुँदै आएको कुन्दन शाहको जय श्री सम्बोधन फेन्सी कपडा पसलमा आगलागी भएको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए । उनका अनुसार सोमबार राति कुन समयमा आगलागी भएको हो भन्ने यकिन छैन ।

तर, प्रहरीले घटनाका बारेमा मंगलबार बिहान ७ बजेतिर मात्रै जानकारी पाएको थियो । घटनाको जानकारी पाउनसाथ वडा प्रहरी कार्यालय विराटनगर र सीआरभी घोघापुलबाट प्रहरी टोली घटनास्थल पुगेको थियो ।

आगलागीबाट पसलभित्र रहेका कपडाहरू जलेर नष्ट भएका छन् । आगलागीबाट करिब २० लाख रुपैयाँ बराबरको क्षति भएको प्रारम्भिक अनुमान गरिएको प्रहरीले जनाएको छ ।

आगलागीबाट मानवीय क्षति भने नभएको प्रहरीले जनाएको छ । आगलागीको कारण खुल्न सकेको छैन । घटनाको थप अनुसन्धान भइरहेको डीएसपी मिश्रले बताए ।