पाथीभरामा चहलपहल बढ्यो, एकै दिन ठूलो संख्यामा तीर्थालु

ताप्लेजुङ । दसैँको नवरात्र सुरु भएसँगै ताप्लेजुङस्थित प्रसिद्ध पाथीभरा शक्तिपीठमा दर्शन गर्न आउने भक्तजनको चहलपहल बढेको छ । मौसम खुल्दै गएपछि पाथीभरा दर्शनका लागि पुग्ने तीर्थयात्रीको संख्या पनि बढ्न थालेको हो ।

पाथीभरा क्षेत्र संरक्षण समितिका राजेन्द्र महतका अनुसार मंगलबार मात्रै एक हजार १७७ जना भक्तजनले पाथीभराको दर्शन गरेका छन् । नवरात्र सुरु भएयता मन्दिरमा दर्शनार्थीको आगमन बढ्दै गएको उनले बताए ।

दसैँमा शक्तिपीठहरूको दर्शन गरी पूजाआजा गर्ने धार्मिक परम्पराअनुसार पाथीभरामा पनि भक्तजन पुग्ने गरेका छन् । विशेषगरी नवरात्रका दिनमा देवीको दर्शन र पूजाआजा गर्न आउनेको संख्या बढ्ने गर्छ ।

केही दिनयता पानी पर्न रोकिएर मौसम सफा र खुला हुन थालेपछि पाथीभरा जाने तीर्थयात्रीलाई सहज भएको छ । मौसम अनुकूल बन्दै जाँदा आगामी दिनमा दर्शनार्थीको संख्या अझै बढ्न सक्ने अपेक्षा गरिएको छ ।

समुद्र सतहबाट करिब तीन हजार ७९४ मिटर उचाइमा रहेको पाथीभरा देवीको मन्दिर ताप्लेजुङको प्रमुख धार्मिक तथा पर्यटकीय गन्तव्य हो । यहाँ नेपालका विभिन्न जिल्लासँगै भारतका सिक्किम, दार्जिलिङलगायत क्षेत्रबाट समेत भक्तजन आउने गरेका छन् ।

दसैँको अवसरमा पाथीभरा दर्शन गर्न जाने भक्तजनले यात्रा गर्दा मौसमको अवस्था, बाटोको स्थिति र स्वास्थ्यको ख्याल गर्न आवश्यक छ । उच्च पहाडी क्षेत्रमा मौसम छिटो परिवर्तन हुन सक्ने भएकाले आवश्यक न्यानो कपडा र यात्राका लागि चाहिने सामग्री साथमा लैजानु उपयुक्त हुन्छ ।