एमाले केन्द्रीय कार्यालयको सुरक्षा बढायो

काठमाडौं । सरकारले दिँदै आएको सुरक्षा हटाएपछि नेकपा (एमाले)ले ललितपुरको च्यासलस्थित केन्द्रीय कार्यालयको सुरक्षा व्यवस्था कडा बनाएको छ ।

एमालेले कार्यालयको सुरक्षाका लागि पूर्वसैनिक तथा पूर्वप्रहरीको टोली परिचालन गरेको छ । साथै, कार्यालय परिसरमा सीसीटीभी क्यामेरा जडान गरी निगरानी बढाएको छ ।

एमाले प्रचार विभाग प्रमुख निरज आचार्यका अनुसार कार्यालय परिसरमा सुरक्षा जोखिम बढेको महसुस भएपछि पार्टीले आफ्नै तर्फबाट सुरक्षा सतर्कता बढाएको हो ।

उनका अनुसार २०४८ सालदेखि सरकारले एमालेको केन्द्रीय कार्यालयलाई उपलब्ध गराउँदै आएको सुरक्षा सेवा हालै कुनै पूर्वजानकारीबिना हटाइएको थियो । त्यसपछि कार्यालय परिसरमा अपरिचित व्यक्तिहरूको अस्वाभाविक आवतजावत र गतिविधि बढेको पार्टीको भनाइ छ ।

नयाँ व्यवस्थाअनुसार पूर्वसैनिक तथा पूर्वप्रहरीको टोलीले २४ सै घण्टा कार्यालयको सुरक्षा गर्नेछ । सीसीटीभीमार्फत परिसरका गतिविधिमाथि समेत निगरानी राखिने एमालेले जनाएको छ ।