चाडपर्वमा डिजिटल वालेटमा रकम जम्मा गर्ने सीमा बढ्यो

काठमाडौं । नेपाल राष्ट्र बैंकले दसैँ, तिहार र छठलाई लक्षित गर्दै डिजिटल वालेटमा रकम जम्मा गर्न सकिने दैनिक सीमा बढाएको छ ।

केन्द्रीय बैंकले भुक्तानी प्रणालीसम्बन्धी एकीकृत निर्देशन संशोधन गर्दै चाडपर्वका अवधिमा प्राकृतिक व्यक्तिले एक दिनमा ५० पटकसम्म वालेटमा रकम जम्मा गर्न सक्ने व्यवस्था गरेको हो ।

नयाँ व्यवस्था असोज ३१ देखि कात्तिक ८ गतेसम्म र कात्तिक २१ देखि कात्तिक २९ गतेसम्म लागू हुनेछ। यसअघि प्राकृतिक व्यक्तिले एक दिनमा अधिकतम १० पटकसम्म मात्रै वालेटमा रकम जम्मा गर्न पाउने व्यवस्था थियो ।

राष्ट्र बैंकले चाडपर्वका बेला नगद कारोबार घटाउँदै डिजिटल भुक्तानीलाई प्रोत्साहन गर्ने नीति लिएको छ । यसअघि पनि केन्द्रीय बैंकले दसैँलगायतका चाडपर्वमा दक्षिणा दिँदा डिजिटल माध्यम प्रयोग गर्न आग्रह गरेको थियो ।

वालेटमा रकम जम्मा गर्ने सीमा बढेसँगै चाडपर्वका बेला डिजिटल कारोबार गर्न सहज हुने र नगदको प्रयोग घटाउन सहयोग पुग्ने अपेक्षा गरिएको छ ।