हिरासतमा रहेकी सुकीलाई बेलायती राजाको उपहार

एजेन्सी । म्यान्मामा हिरासतमा रहेकी नोबेल शान्ति पुरस्कार विजेता आङ सान सुकीलाई बेलायतका राजा चार्ल्स तृतीयले उपहार पठाएका छन् । म्यान्माका अधिकारीहरूले दुई महिनापछि उनको पहिलो तस्बिर सार्वजनिक गर्दै ‘विशेष महिला कैदी’ भनेर उल्लेख गरेका छन् ।

प्याकेजमा माटोसम्बन्धी दुई पुस्तक, एउटा शिलबन्दी खाम र राजाले पठाएको गोप्य कूटनीतिक पत्र रहेको म्यान्माका राष्ट्रपतीय प्रवक्ताले बताएका छन् । सन् २०२१ को सैनिक विद्रोहबाट सत्ताच्युत भएकी सुकीलाई पछि नजरबन्दमा सारिएको थियो ।

गत अप्रिलमा पूर्व सैनिक शासक मिन आङ ह्लाइङ नागरिक राष्ट्रपतिका रूपमा स्थापित भएको निर्वाचनमा उनको पार्टी सहभागी हुन पाएको थिएन । सैनिक विद्रोहपछि म्यान्मामा गृहयुद्ध चर्किएको छ । द्वन्द्वमा एक लाखभन्दा बढी मानिसको मृत्यु भएको द्वन्द्व अनुगमन संस्था एसीएलइडीले जनाएको छ ।

बेलायतले सुकीको हिरासतलाई ‘मनमानी नजरबन्द’ भन्दै उनलाई तत्काल र बिना शर्त रिहा गर्न माग गर्दै आएको छ । बेलायती विदेश कार्यालयले भने प्याकेज कूटनीतिज्ञमार्फत हस्तान्तरण गर्ने प्रयास भएको थियो वा त्यसका लागि अनुमति अस्वीकार गरिएको थियो भन्ने स्पष्ट पारेको छैन ।