बङ्गालको खाडी क्षेत्रमा सुरक्षा सहकार्य सुदृढ गर्ने श्रीलंकाको प्रतिबद्धता

एजेन्सी ।  श्रीलंकाले बङ्गालको खाडी क्षेत्रमा आतंकवाद, लागुऔषध तस्करी, मानव बेचबिखन तथा साइबर अपराध नियन्त्रणका लागि क्षेत्रीय सहकार्यलाई थप सुदृढ गर्ने प्रतिबद्धता जनाएको छ।

भारतको नयाँ दिल्लीमा अक्टोबर १३ मा आयोजित पहिलो बिमस्टेक गृहमन्त्रीस्तरीय बैठकमा सहभागी हुँदै श्रीलंकाका सार्वजनिक सुरक्षा तथा संसदीय मामिलामन्त्री आनन्द विजेपालाले सदस्य राष्ट्रहरूबीच समयमै सूचना आदानप्रदान र प्रभावकारी समन्वय आवश्यक रहेको बताएका हुन्।

भारतका गृहमन्त्री अमित शाहको अध्यक्षतामा सम्पन्न बैठकमा बङ्गलादेश, भुटान, भारत, म्यान्मा, नेपाल, श्रीलंका र थाइल्यान्डका प्रतिनिधिहरू सहभागी थिए। बैठकले क्षेत्रीय सुरक्षा सहकार्यलाई प्रभावकारी बनाउने उद्देश्यसहित दिल्ली घोषणापत्र स्वीकृत गरेको भारतस्थित श्रीलंकाली उच्चायोगले जनाएको छ।

घोषणापत्रमा आतंकवाद, लागुऔषध तस्करी, मानव बेचबिखन, सम्पत्ति शुद्धीकरण तथा सङ्गठित अपराध नियन्त्रणका लागि सदस्य राष्ट्रहरूबीच सूचना आदानप्रदान, कानुनी सहायता, सुपुर्दगी र संयुक्त कारबाहीलाई प्राथमिकता दिइएको छ। यस्ता अपराध नियन्त्रण गर्न क्षेत्रीय स्तरमा समन्वय र सहकार्यलाई प्रभावकारी बनाउने विषयमा पनि जोड दिइएको छ।

यसअघि अक्टोबर १२ मा आयोजित वरिष्ठ अधिकारीहरूको बैठकमा लागुऔषध नियन्त्रण, आतंकवादी गतिविधिमा हुने वित्तीय सहयोग रोकथाम तथा विपद् व्यवस्थापनका विषयमा छलफल भएको थियो।

मन्त्री विजेपालाले क्षेत्रीय सुरक्षा सहकार्यले नागरिकको जीवन रक्षाका साथै बङ्गालको खाडी क्षेत्रमा शान्ति, स्थिरता, विकास र समृद्धि प्रवर्द्धन गर्न योगदान पुर्‍याउने बताएका छन्।

बिमस्टेकमा आबद्ध राष्ट्रहरूबीच सुरक्षा सम्बन्धी सहकार्य विस्तार गर्ने प्रयासले सीमापार अपराध नियन्त्रण तथा क्षेत्रीय स्थायित्व कायम गर्न सहयोग पुग्ने अपेक्षा गरिएको छ।